9-cu Qafqaz Beynəlxalq Mehmanxana, restoran və supermarketlər üçün avadanlıq və ləvazimatlar sərgisi keçiriləcək

"AITF" sərgisi ilə eyni vaxtda regionun mehmanxana və restoran sənayesi üzrə yeganə ixtisaslaşdırılmış tədbiri - 9-cu Qafqaz Beynəlxalq Mehmanxana, restoran və supermarketlər üçün avadanlıq və ləvazimatlar ("HOREX Caucasus 2015") sərgisinə start veriləcək. Yaxın gələcəkdə Azərbaycanda Birinci Avropa İdman Oyunları ("Baku 2015"), Beynəlxalq Şahmat Federasiyasının Kuboku ("FİDE 2015"), Asiya İnkişaf Bankının 48-ci İllik Toplantısı ("ABD Annual Meeting 2015"), daha sonra Şahmat üzrə Dünya Çempionatı (2016), "Formula-1" avtomobil yarışları üzrə dünya çempionatının mərhələsi (2016) və İslam Həmrəylik Oyunları (2017) kimi çoxsaylı beynəlxalq tədbirlərin keçirilməsi planlaşdırılır. Bu tədbirlərin keçirilməsi ilə əlaqədar mehmanxana, restoran, idman kompleksləri və biznes mərkəzlərinin intensiv tikintisi həyata keçirilir ki, bu da "HOREX Caucasus 2015" sərgisinin əhəmiyyətini daha da artırır. Belə ki, məhz bu sərgidə yeni inşa edilmiş və gələcəkdə inşa olunacaq obyektlər üçün "Mehmanxana, Restoran və Kafelər" ("HoReCa") sektoru üzrə aparıcı beynəlxalq istehsalçı və distribyutorların təklif etdikləri bütün zəruri avadanlıq və ləvazimatları, eləcə də qida məhsulları və içkiləri seçmək mümkündür.

Beləliklə, "HOREX Caucasus 2015" sərgisində Azərbaycan, İtaliya, Koreya, Litva, Rusiya və Türkiyənin aparıcı şirkətləri təqdim olunur. Sərgi iştirakçıları arasında "Asena", "Ateşe Makine Kazan", "Billur MS", "Coffee Planet Azerbaijan", "Günəş", "HoReCa", "Hotstar", "HRS" ("Hotel & Restaurant Systems"), "Hurom", "Inter Isi", "Refra" ASC, "Kaan Celik Kasa", "Lactalis", "Netsa Metal", "RULOPAK Hijyen Sistemleri", "Zama" və başqa şirkətlər yer alır.

Sərginin ziyarətçiləri qismində mehmanxana, ticarət və mətbəx avadanlıqları üzrə distribütor və istehsalçılar, habelə rəhbər şəxslər, marketinq, eləcə də restoran, mehmanxana və spa mərkəzlərinin tədarük menecerləri dəvət olunub. Həmçinin, şadlıq sarayları, supermarketlər, iaşə xidmətləri, istirahət ocaqları, sağlamlıq mərkəzləri, fitnes klublar, sanatoriya və biznes mərkəzlərinin tədarük üzrə menecerləri də sərginin ziyarətçiləri arasında olacaq.