Naxçıvanda sertifikatlaşdırmanın ikinci dövriyyəsi üzrə imtahanlar yekunlaşıb - FOTO

Naxçıvan Muxtar Respublikasında dövlət ümumi təhsil müəssisələrində çalışan təhsilverənlərin sertifikatlaşdırılması prosesinin ikinci dövriyyəsi üzrə test imtahanları yekunlaşıb.

Milli.Az xəbər verir ki, test imtahanlarında alman, fransız, ingilis, rus dilləri, Azərbaycan dili, Azərbaycan dili və ədəbiyyatı, informatika, riyaziyyat, kimya, biologiya, fizika, ibtidai sinif, coğrafiya, fiziki tərbiyə, gənclərin çağırışaqədərki hazırlığı, musiqi, tarix, təsviri incəsənət və texnologiya müəllimləri iştirak ediblər.

İmtahanlarda 2748 təhsilverən iştirak edib. Dörd gün davam edən imtahan mərhələsində 99 faiz iştirak göstəricisi qeydə alınıb. İmtahanda iştirak edən təhsilverənlərin 1124-ü (41 faiz) 51-60 bal aralığında nəticə göstərib. Təhsilverənlərdən 14-ü maksimum nəticə - 60 bal toplayıb. Onlardan 5-i ingilis dili, 1-i Azərbaycan dili və ədəbiyyatı, 2-si riyaziyyat, 1-i biologiya, 3-ü ibtidai sinif və 2-si tarix müəllimidir.

Bununla yanaşı, 1312 müəllim, yəni iştirakçıların 48 faizi 30-50 bal aralığında nəticə əldə edib.

Qeyd edək ki, sertifikatlaşdırmanın ikinci dövriyyəsinə 2021-ci ildə prosesdən uğurla keçən, eləcə də 2021-2022-ci illərdə sertifikatlaşdırmada uğur qazana bilməyən təhsilverənlər cəlb olunublar.

Xatırladaq ki, Nazirlər Kabinetinin müvafiq qərarına əsasən, dövlət ümumi təhsil müəssisələrində çalışan təhsilverənlərin sertifikatlaşdırma nəticələrinə uyğun olaraq vəzifə maaşlarına əlavələr tətbiq edilir.

Milli.Az