BP Azərbaycanda platformanın texniki işlərini başa çatdırıb

BP (Azərbaycanda "Azəri-Çıraq-Günəşli" yataqlar blokunun işlənməsinin operatoru) Xəzər dənizində üç hasilat platformasının planlı texniki xidmət proqramı çərçivəsində "Mərkəzi Azəri" platformasında işləri başa çatdırıb. Bu barədə Trend-ə şirkətdən məlumat veriblər.

Məlumata əsasən, platformada nəzərdə tutulan işlər başa çatıb və hazırda test sınaqları üzrə işlər davam etdirilir.

"Platformanın işə salınması bir neçə gün ərzində baş tutacaq", - şirkətdən deyiblər.

Şirkət bir müddət əvvəl artıq "Şərqi Azəri" və "Qərbi Azəri" platformalarında işləri dayandırmışdı, lazımi işləri gördükdən sonra isə yenidən platformaları işə saldı.

Əvvəl verilən məlumata görə, plana uyğun olaraq, üç platformada - "Şərqi Azəri", "Qərbi Azəri" və "Mərkəzi Azəri"də hasilat texniki xidmətin göstərilməsini təmin etmək məqsədilə planlı ardıcıllıqla dayandırılacaq. Şirkətdən qeyd edildiyi kimi, hər üç platformanın eyni vaxtda dayandırılması nəzərdə tutulmur. Platformalardan birində iş görülən zaman "Azəri" yatağında yerləşən digər iki platformada hasilat davam etdiriləcək. Bu, gündəlik texniki xidmət proqramıdır və cari işin bir hissəsidir.

Təmir-istismar işlərinə bir il bundan əvvəl başlanılıb və bu işlər illik iş proqramına və büdcəyə daxildir.

"Azəri" yatağındakı texniki xidmət proqramına ümumi mexaniki, alət və digər işlər daxildir. Platforma 11-15 günə planlı ardıcıllıqla bağlanacaq. Proqrama təxminən oktyabrın 20-də başlanması planlaşdırılır.

"Azəri-Çıraq-Günəşli" yataqlar blokunda hasilatın pay bölgüsü barədə saziş 1994-cü ildə imzalanıb. Layihənin iştirakçıları aşağıdakılardır: BP (operator - 35,83 faiz iştirak payı), "Chevron" (11,27 faiz), AzACG (11,6 faiz), INPEX (10,96 faiz), "Statoil" (8,56 faiz), "Exxon" (8 faiz), TPAO (6,75 faiz), "Itochu" (4,3 faiz), "Hess" (2,72 faiz).

Milli.Az