İqtisadiyyat

“Nabucco” rəsmisi: "Layihənin dəyəri ilə bağlı dərc edilən göstəricilər dəqiq deyil"

6 May 2011 17:20

Baxış: 1 308

VTB-də yüksək depozit faizleri daha çox qazandırır

#OİL AND NATURAL GAS MARKETS #ENERGY PİPELİNES

""Nabucco" qaz kəməri layihəsinin dəyəri ilə bağlı dərc edilən göstəricilər ehtimal xarakteri daşıyır və dəqiq deyil". Bu barədə Milli.Az xəbər portalına "Nabucco Gas Pipeline International" şirkətinin ictimaiyyətlə əlaqələr şöbəsinin rəhbəri Kristian Dolezal bildirib.

O, qaz kəməri layihəsinin dəyərinin əvvəllər bəyan olunan 7,9 mlrd. avrodan 12-15 mlrd. avroyadək artırılması ilə bağlı yayılan məlumatları şərh edib.

"Hazırda nəzərdə tutulmuş 7,9 milyard Avro investisiya göstəriciləri Nabukko layihəsi üzrə 2005-ci ildə aparılmış texniki-iqtisadi əsaslandırmadan irəli gəlir. Həmin göstəricilər hazırda yenidən nəzərdən keçirilir. Nabukko layihə heyəti faktlara əsaslanan nəticələri açıqlayacaq. Bu ərəfədə dərc edilən hər hansı digər göstəricilər ehtimal xarakteri daşıyır və dəqiq deyil" - deyə şirkət rəsmisi əlavə edib.

Qeyd edək ki, "Nabucco" qaz kəməri Xəzər regionundan təbii qazın Rusiyadan yan keçməklə Azərbaycan, Gürcüstan, Türkiyə, Bolqarıstan, Macarıstan, Rumıniya və Avstriya vasitəsilə Mərkəzi Avropaya ixracı üçün nəzərdə tutulub. Tikintisinə 2012-ci ildə başlanacaq "Nabucco" qaz kəməri ilə Azərbaycan qazının nəqlinin 2015-ci ildən baş tutacağı gözlənilir. Nəqletmə gücü ildə 31 mlrd. kubmetr olan kəmərlə Azərbaycanla yanaşı, Türkmənistan və İraq qazı da daşınacaq. Layihənin dəyərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək.

Anar Məmmədov
Milli.Az