Avtobuslara hücum edən sahibkar saxlanıldı - YENİLƏNİB - FOTO

Sərnişindaşıma sahəsində göstərilən xidmətin keyfiyyəti, təhlükəsizliyi və rahatlığının artırılması məqsədilə marşrut xətləri qanunvericiliyin tələblərinə uyğun olaraq AYNA tərəfindən mərhələli qaydada müsabiqəyə təqdim edilir.

Milli.Az agentliyə istinadən xəbər verir ki, bu işlər çərçivəsində Bayıl yaşayış sahəsini Səbail rayonunun Salman Mümtaz küçəsi ilə əlaqələndirən 56 nömrəli şəhərdaxili marşrutu da müsabiqəyə təqdim olunub və sentyabrın 5-də qalib elan olunub.

Beləliklə, sərnişinlərin ixtiyarına müasir və komfortlu avtobuslar verilib. Lakin xəttə buraxılan yeni avtobuslara xəttin köhnə istismarçısı tərəfindən hücum edilib və nəqliyyat vasitələrinə zərər yetirilərək marşrutun fəaliyyətinə əngəl törədilib.

Baş verən insidentlə əlaqədar hadisəni törədənlər polis şöbəsinə aparılıb. Hüquq-mühafizə orqanları tərəfindən izahatları alınıb. Müvafiq araşdırmalar davam etdirilir.

Qeyd edək ki, zərər yetirilən avtobuslar təmir edilərək xəttə qaytarılıb və hazırda sərnişinlərin xidmətinə verilib.

----------------

2024.09.16

Səbail rayonu Bayıl qəsəbəsində yeni xəttə buraxılan avtobuslara hücum edilib.

Milli.Az Avtosfer.az-a istinadən xəbər verir ki, qəsəbədaxili fəaliyyət göstərən 56 nömrəli marşrutun sahibi Niyazı İsmayılov adlı şəxs bu gün yeni xəttə çıxan digər sahibkarın işinə əngəl olub.

Onun yeni xəttə buraxılan "Qazel" markalı avtobusların təkərlərini deşərək qarşı tərəfə maddi ziyan vurduğu bildirilir. Məlumata görə, sahibkar köhnə avtobuslarla xəttə çıxaraq sərnişin daşımağa davam edib.

Lakin bir qədər sonra N.İsmayılov polis tərəfindən saxlanılıb, təkərləri deşilmiş avtobuslar təmir edilərək xəttə buraxılıb.

DİN-in Mətbuat Xidmətinin əməkdaşı İbrahim Əmiraslanlı "Qafqazinfo"nun sorğusuna cavab olaraq bildirib ki, məsələ ilə bağlı hazırda ərazi üzrə polis orqanında təhqiqat araşdırması aparılır.

Qeyd edək ki, AYNA tərəfindən sentyabrın 5-də keçirilən müsabiqədə 56 nömrəli şəhərdaxili (Bayıl yaşayış sahəsi - Səbail rayonu, Salman Mümtaz küçəsi) marşrut üzrə hüquqi şəxs "Xan Nəqliyyat" MMC komissiya üzvləri tərəfindən qalib elan olunub.  

Milli.Az
Xəbərlərimizi WhatsApp kanalımızdan da oxuyun