Gəncədə sərxoş sürücü maşınını sərnişin avtobusuna çırpıb, yaralılar var

Ötən gecə Gəncədə avtomobil qəzası baş verib. Nəticədə 5 nəfər yaralanıb.

Milli.Az Kəpəz TV-yə istinadən bildirir ki, hadisə 22:00 radələrində Atatürk prospekti ilə İsrafil Məmmədov küçəsinin kəsişməsində baş verib. "Opel" markalı avtomobil yolun kənarında dayanan Qələndər Hüseynova məxsus "Hyundai" markalı avtobusa çırpılıb. Nəticədə minik avtomobilinin sürücüsü Müzadil Sarıyev və 4 sərnişin yaralanaraq Gəncə Şəhər Təcili Tibbi Yardım xəstəxanasına gətiriliblər. Həkimlərin sözlərinə görə, yaralıların həyatı üçün təhlükə yoxdur.

Məharət Kərimov - Gəncə şəhər TTYX-nın həkimi: "Avtoqəza nəticəsində şöbəmizə 5 nəfər xəstə gətirilib. Sarıyev Müzadil və Cumalıyev Namiqə stasionar yardım edilib. Qalan üç nəfərə isə ambulator yardım göstərilib və onlar evə yollanıblar".

Hadisə yerinə gələn hüquq-mühafizə orqanları əməkdaşlarının sözlərinə görə, hadisəyə səbəb "Opel" markalı avtomobilin sürücüsünün sərxoşluğu olub. Yaxınlıqda yaşayan şahidlərin sözlərinə görə, bu ərazidə mütəmadi olaraq avtomobil qəzası baş verir və işıqfora böyük ehtiyac var.

Sakin: "Mənim qapıma bir neçə dəfə avtomobil dəyib, qapımı dağıdıb".

Sakin: "Bu ərazidə mütəmadi olaraq qəzalar baş verir. Demək olar ki, hər həftə qəza olur".

Hazırda faktla bağlı araşdırma aparılır. Yekun nəticələr isə avtoekspertizadan sonra bəlli olacaq.

Milli.Az