Dünya

Uber Niderlandda 825 milyon avro cərimələndi

22 Avqust 2026 13:51

Baxış: 676

VTB-də minimal faiz dərəcəsi ilə nağd kredit 9.9%-dən

#TAKSİ #CƏRİMƏ #NİDERLAND

Niderlandın Məlumatların Mühafizəsi üzrə İdarəsi (AP) sürücülərin hesablarını onlara lazımi qaydada məlumat vermədən avtomatlaşdırılmış şəkildə deaktiv etdiyi üçün Amerikanın Uber platformasını 824,99 milyon avro məbləğində cərimələyib.

Milli.Az Trend-ə istinadən bildirir ki, bazar ertəsi qəbul edilən və AP tərəfindən hələ dərc olunmayan qərarda qurum Avropanın Ümumi Məlumatların Mühafizəsi Qaydalarına (GDPR) istinad edib. Bu qaydalar şəxsin "yalnız avtomatlaşdırılmış emala əsaslanan qərara məruz qalmamaq" hüququnu təsbit edir. AP-nin nümayəndəsi cümə günü AFP-yə qərarı və cərimənin məbləğini təsdiqləyib.

AP-nin təsdiqlədiyinə görə, Uber-ə qarşı Fransada verilmiş şikayətlə başlayan iş 2020-2022-ci illər arasında Avropada baş vermiş insidentlərlə bağlıdır. Amerika avtomobil sifarişi nəhənginin Avropadakı baş ofisi Amsterdamda yerləşdiyinə görə iş Niderlandda araşdırılıb.

"Biz bu qərarla, eləcə də cərimənin qeyri-mütənasib məbləği ilə qəti şəkildə razılaşmırıq və apellyasiya şikayəti verəcəyik", - deyə Uber AFP-yə bildirib.

Amerikanın avtomobil sifarişi nəhənginin sözlərinə görə, AP "bir neçə il əvvəl dayandırılmış köhnə təcrübələri" araşdırıb.

Uber sürücülərə təsir edən qərarlara "çox ciddi" yanaşdığını və bu qərarların "ədalətli" və "qərəzsiz" olmasını təmin etdiyini bildirib.

Şirkət qeyd edib: "Bu, həmin qərarların insanlar tərəfindən nəzərdən keçirilməsini, güclü müdafiə mexanizmlərinin tətbiqini nəzərdə tutur və sürücülər bizim səhvə yol verdiyimizi hesab etdikləri halda apellyasiya etmək imkanına malikdirlər".

Müəllif: Tural Hüseyn (Milli.Az redaktor)