Ərdoğan - Zelenski görüşü başa çatdı - YENİLƏNİB

Ərdoğan - Zelenski görüşü başa çatıb

------

16:51

İstanbulda Rusiya və Ukrayna nümayəndə heyətlərinin görüşü başlayıb.

13:13

Zelenski Türkiyədə səfərdədir.

Ukrayna liderinin təyyarəsi Ankaraya enib.

-------

09:40

Rusiya və Ukrayna arasında davam edən münaqişənin həllinə yönəlmiş yeni danışıqlar bu gün İstanbulda keçiriləcək. Görüş Moskva vaxtı ilə saat 10:00-da (Bakı vaxtı ilə 11:00) başlayacaq. Dünya ictimaiyyəti uzun müddətdir davam edən müharibənin diplomatik yollarla sonlandırılması üçün mühüm sayılan bu zirvəyə diqqət kəsilib.

Milli.Az xəbər verir ki, Ukrayna prezidenti Volodimir Zelenski Rusiya prezidenti Vladimir Putini birbaşa görüşə dəvət etsə də, Kremlin bu təklifə mənfi cavab verdiyi bildirilib. Bunun əvəzinə, Rusiya nümayəndə heyətinə prezidentin müşaviri Vladimir Medinskiy rəhbərlik edəcək. Heyətə həmçinin Rusiya Xarici İşlər Nazirinin müavini Mixail Qaluzin, Baş Qərargah Baş İdarəsinin rəhbəri İqor Kostyukov və Müdafiə Nazirinin müavini Aleksandr Fomin daxildir.

Ukraynanı isə İstanbulda keçiriləcək müzakirələrdə xarici işlər naziri Andrii Sybiha, Prezident Administrasiyasının rəhbəri Andriy Yermak, müdafiə naziri Rüstem Umerov və prezidentin müşaviri İhor Jovkva təmsil edəcək.

Görüşlər Türkiyə Prezident Administrasiyasının İstanbul Dolmabahçe Ofisində baş tutacaq. ABŞ Prezidenti Donald Trump görüşlərə qatılmayacaq. Lakin ABŞ Dövlət Katibi Rubio və Orta Şərq üzrə nümayəndə Witkoff-un Cümə günü İstanbulda olacağı açıqlanıb.

Xatırladaq ki, Türkiyə isə bu illər ərzində hər iki tərəf arasında dialoq qurmaq üçün davamlı səylər göstərib. 2022-ci ildə İstanbulda keçirilmiş müzakirələr və sonradan əldə edilən "Qara Dəniz Taxıl Təşəbbüsü" razılaşması beynəlxalq aləmdə geniş əks-səda doğurmuşdu.

Son olaraq, Rusiya Prezidenti Vladimir Putin 11 may tarixində danışıqların ön şərtsiz bərpası üçün 15 mayı təklif edərək, Türkiyədən ev sahibliyi etməsini istəmiş, Ukrayna tərəfi isə bu təşəbbüsə dəstək vermişdi.

Fidan
Milli.Az