İşdə "tumarlanan" katibələr - Ekspert NƏLƏR DEDİ?

"Vəzfəli şəxslər tərəfindən təkcə katibələrə deyil, orada çalışan qadınların əksəriyyətinə qarşı seksual qısnamalar var. Amma çox təəssüf ki, iş yerlərində olan seksual qısnamalarla bağlı heç bir müraciət yoxdur. Buna səbəb qadınların iş yerini itirmək qorxusudur".

Milli.Az xəbər verirki, bunu lent.az-a "Təmiz Dünya" Qadınlara Yardım İctimai Birliyinin rəhbəri Mehriban Zeynalova bildirib.

Ötən gün sosial şəbəkələrdə yayılan Milli Məclisin keçmiş deputatı, YAP-ın Veteranlar Şurasının üzvü Hüseynbala Mirələmovun videosu geniş müzakirələrə səbəb oldu. Çoxları katibə işləyən qadınların əksəriyyətinin məhz belə halla üzləşdiyini də vurğuladı. Görəsən, buna səbəb nədir? Ümumiyyətlə, katibə anlayışı niyə birmənalı qarşılanmır?

Mehriban Zeynalovanın sözlərinə görə, katibə seçilən qadın az qala  müdirin bütün ehtiyaclarını ödəyən fiqura çevrilir:

"Sovet vaxtı ailələrin çoxu öz uşaqlarını katibə işləməyə qoymurdu. Bəzi ailələrdə, ümumiyyətlə, qızlarının katibə işləməsi onlar üçün aşağılanmaq demək idi. Çünki sovet dönəmində belə bir fikir formalaşmışdı ki, katibələr bütün məlumatları bilirlər, müdirin bütün ehtiyaclarını ödəyən fiqura çevrilirlər. Adətən, katibə seçilən qızın bilik və bacarığına deyil, onun seksual görünüşünə diqqət edirdilər. İndi əslində o məsələlər aradan qalxıb. Amma hələ də bəzi iş yerlərində katibə seçərkən belə sui-istifadələr olur".

Mehriban Zeynalova deyir ki, bəzi qadınlar onlara qarşı belə münasibətin olmasına razılaşırlar. Buna səbəb isə...

"Ən dəhşətlisi də budur. Çünki oradakı imtiyazlardan bəhrələnəcəklər. Bura onun yaxşı yaşaması üçün yaradılan şərait, müəyyən resursların əlçatan olması və maddi imkanlarının genişlənməsi aiddir. Əgər qadınlar belə problemlərə görə vaxtında müraciət etsələr və buna görə cəzalanmanın tətbiqi güclənsə, belə hallarla rastlaşılmaz. Çox yaxşı olardı ki, qadınlar məhz işə, madiyyata görə susmasınlar".

Birlik rəhbəri onu da bildirib ki, qız uşaqlarının doğulmasının qarşısını almaq, yaxud erkən nikah məsələlərinin kökündə də bu məsələ durur:

"İnsanlar düşünür ki, vaxtında "problemi həll edim ki, sonradan stress yaşamayım". Bundan başqa, kişilər də qadınlarının, adətən müəllim və ya qadınların çalışdığı yerlərdə işləməsini istəyirlər. Buna görə də biz hamımız bu problemin həll olunması üçün çalışmalıyıq. İş yerlərində baş verən seksual qısnamalara görə heç bir qadın susmamalıdır. İş yerində belə hadisələrin şahidi olan insanlar da səssiz qalmamalıdır".

Milli.Az