Qızıl Aypara Cəmiyyəti kompyuter kursu açıb

Milli.Az xəbər portalının Kəpəz TV kanalına istinadən verdiyi məlumata görə, bölgələrdə yerli bölmələrin inkişafına xüsusi önəm verən Azərbaycan Qızıl Aypara Cəmiyyəti yerlərdə bir sıra tədbirlər həyata keçirməkdədir.

Belə layihələrdən biri isə bu gün Qızıl Aypara Cəmiyyətinin Gəncə Regional Bölməsində gənclər üçün fəaliyyətə başlayan kompyuter kursudur. Kompyuter kursunun təqdimat mərasimində Azərbaycan Qızıl Aypara Cəmiyyətinin vitse-prezidenti Qafar Əsgərzadə, Beynəlxalq Qızıl Xaç Komitəsinin Bərdə ofisinin rəhbəri Elen Plenevü və yerli bölmənin əməkdaşları iştirak edib.

Çıxışlarda bildirilib ki, Qızıl Aypara Cəmiyyətinin Gəncə Regional Bölməsinə Kompyuterlər Beynəlxalq Qızıl Xaç Komitəsi tərəfindən verilib. Altı ədəd kompyuter vasitəsi ilə həftənin beş günü aztəminatlı və şəhid ailələrinin övladları təmənnasız, digər təbəqədən olan vətəndaşlar isə ödənişli əsaslarla kompyuter biliklərinə yiyələnəcəklər. Kommersiya strukturu və istehsal sahələri olmayan Qızıl Aypara Cəmiyyəti fəaliyyətini üzvlük haqları və ianələr hesabına həyata keçirdiyindən kursların müəyyən qismini pullu edir.

Azərbaycan Qızıl Aypara Cəmiyyətinin vitse-prezidenti Qafar Əsgərzadə deyib ki, pullu kurslardan əldə ediləcək maliyyə vəsaitləri yalnız bu kursların daha da genişləndirilməsinə, eləcə də, Qızıl Aypara Cəmiyyətinin Gəncə Regional bölməsində qeydiyyatda olan tənha qocalara, imkansız insanlara və digər humanitar yardımların göstərilməsində istifadə
ediləcək. Kompyuter kurslarından sonra isə Qızıl Aypara Cəmiyyəti tərəfindən gənclər üçün ingilis dili və ilkin tibbi yardımın öyrədilməsi məqsədilə kursların açılması da planlaşdırılır.

Xatırladaq ki, Qızıl Aypara Cəmiyyətinin cəbhəyanı yeddi bölməsində belə kurslar fəaliyyət göstərir. Digər bölmələrdə isə gələcəkdə bu qəbildən olan kursların açılması nəzərdə tutulur.

Milli.Az