Fəxri Qasımovun şirkətində 300-ə yaxın işçi ixtisar edildi - "Aylardır maaşlarını ala bilmirlər"

"Guavalab" şirkətində işçilər kütləvi ixtisar edilib və əməkdaşlar aylardır maaşlarını ala bilmir.

Milli.Az xəbər verir ki, 2025-ci ilin sentyabr ayında "Guavalab"da təxminən 300 əməkdaş ixtisar edilib.

Bildirilir ki, həmin tarixdən bu günədək sentyabr və oktyabr ayları üzrə əməkhaqları, istifadə olunmamış məzuniyyət ödənişləri və ixtisara görə qanunla nəzərdə tutulan kompensasiyalar əməkdaşlara ödənilməyib.

Məsələ ilə bağlı əməkdaşlar tərəfindən bütün müvafiq dövlət qurumlarına rəsmi müraciətlər edilsə də, indiyədək hər hansı konkret nəticə əldə olunmayıb.

İddialara görə, ixtisardan sonra əməkdaşların əksəriyyəti şirkətin rəsmi məlumat platforması hesab edilən "Telegram" işçi qrupundan çıxarılıb, bununla da onların məlumatlara çıxışı məhdudlaşdırılıb. Qrupda qalan əməkdaşlara isə rəsmi məlumat verilmədiyi, yazışma imkanlarının da ofis rəhbəri Fəxri Qasımov tərəfindən məhdudlaşdırıldığı bildirilir.

Keçmiş əməkdaşların sözlərinə görə, rəsmi direktor Fəxri Qasımova dəfələrlə müraciət edilib. Son dörd ay ərzində dəfələrlə ödənişlərin "bu həftə həyata keçiriləcəyi" bildirilsə də, faktiki olaraq heç bir ödəniş icra olunmayıb. Hazırda isə Fəxri Qasımov əməkdaşların zənglərinə cavab vermir və göndərilən mesajlara baxmır, bu da hər hansı rəsmi kommunikasiya imkanını tamamilə aradan qaldırır.

Bundan əlavə, bir neçə əməkdaşın Orxan Nəsibov və Elxan Nəsibovla "Telegram" və "WhatsApp" vasitəsilə əlaqə saxlamağa çalışdığı, lakin bloklandıqları və yazışmaların qarşılıqlı şəkildə silindiyi qeyd olunur.

Bildirilir ki, rəhbərlik tərəfindən şirkətin bankrot olmadığı və bütün ödənişlərin ediləcəyi deyilsə də, Orxan Nəsibov 2026-cı il yanvarın 9-da rəhbər vəzifəsindən istefa verib.

Şikayətçilər problemin qanuni şəkildə həllinə nail olmaq istəyirlər.

Mina Mikayılova
Milli.Az