Varlıların bank hesablarından kasıblara PUL KÖÇÜRƏN bank müdiri - VİDEO

2009-cu ildə İtalyada baş verən hadisə illər keçsə də müzakirə mövzusu olaraq qalır.

Milli.Az xəbər verir ki, bank müdiri vəzifəsində çalışan Cilberto Baskiera kredit almaq istəyən, lakin imkanı çatmayan müştərilərin müraciətlərini görəndə sistemə "öz üsulu" ilə müdaxilə etmək qərarına gəlib.

Hadisə necə baş verib?

Məlumata görə, bankdan kredit götürmək istəyən bəzi kasıb müştərilərin müraciətləri rədd edilib. Bundan sonra müdiri qərara alıb ki, varlı müştərilərin hesablarından az-az məbləğdə vəsaiti gizli şəkildə digər - maddi imkanı zəif şəxslərin hesablarına köçürsün.

Plan belə olub ki, kredit alan şəxslər sonradan həmin pulları geri qaytarsınlar və heç kim zərər görməsin. Lakin bəzi müştərilər vəsaiti geri ödəməyib.

1 milyon avroluq əməliyyat

İddialara görə, 7 il ərzində sistemdəki boşluqdan istifadə edilərək ümumilikdə 1 milyon avroya yaxın vəsait köçürülüb. Nəticədə məsələ üzə çıxıb və hüquq-mühafizə orqanları müdaxilə edib.

Bank müdiri saxlanılıb və məhkəmə tərəfindən 2 il həbs cəzası alıb. Lakin onun özünə bir qəpik belə götürmədiyi, şəxsi qazanc əldə etmədiyi nəzərə alınaraq həbs cəzası təxirə salınıb.

"Bir də etmərəm..."

İşini və evini itirən keçmiş bank müdiri sonradan açıqlamasında bildirib:

"Bir də eyni şeyi etmərəm. İnsanlardan həmrəylik görmədim. Bəziləri heç nə baş verməmiş kimi davrandılar".

Hadisə cəmiyyətdə birmənalı qarşılanmayıb. Bəziləri onu "Robin Hud" adlandıraraq kasıblara kömək etdiyi üçün dəstəkləyib. Digərləri isə bank sisteminə qanunsuz müdaxiləni cinayət sayaraq bu addımı düzgün hesab etməyib.

Mütəxəssislər bildirirlər ki, niyyət yaxşı olsa belə, maliyyə sistemində qanunsuz əməliyyatlar hüquqi məsuliyyət yaradır.

Bu hadisə bir daha göstərir ki, sosial ədalət anlayışı ilə qanun arasında incə xətt mövcuddur. Cilbertonun hekayəsi həm mərhəmət, həm də məsuliyyət mövzusunda uzun müddət müzakirə olunacaq hadisələrdən biri kimi tarixə düşüb.

Hüseyn
Milli.Az