İqtisadiyyat

İqlim maliyyəsi üzrə müzakirələr dalana dirənib - Braziliyalı nazir

23 Noyabr 2024 23:40

Baxış: 512

#İQLİM DƏYİŞİKLİYİ

İqlim maliyyəsi üzrə müzakirələr dalana dirənib.

Milli.Az Trend-ə istinadən xəbər verir ki, bunu Braziliyanın Ətraf Mühit və İqlim Naziri Marina Silva COP29-un yekun plenar iclasının birinci hissəsinin yekunlarına dair mətbuat konfransında deyib.

"Bütün qalan problemlər arasında maliyyə əsasıdır. Təəssüf ki, proses dalana dirənib. Əsas səbəb odur ki, yalnız dünən mətnə və konkret maliyyələşdirmə rəqəmlərinə çıxış əldə etmişik. Bununla belə, hələ də təkmilləşdirmə tələb edən məqamlar var", - o bildirib.

Nazir vurğulayıb ki, donor ölkələr öz maliyyə öhdəliklərini yerinə yetirməlidirlər.

"İnkişaf etməkdə olan ölkələr, vurğulayıram, öz mənfəətləri üçün kömək istəmirlər. Söhbət hər kəsə fayda verəcək keçid və transformasiya üçün lazım olan resurslardan gedir. Ekstremal iqlim hadisələrinin artması yoxsulluğu daha da gücləndirdiyi üçün dolayı yolla kömək edə bilsə də, bu ölkələr yoxsulluğun həlli üçün maliyyə axtarmır. Məqsəd hamıya fayda verən səylər göstərməkdir", - o əlavə edib.

Milli.Az