Tramp Maskı vəzifədən niyə azad edir?

ABŞ prezidenti Donald Tramp Hökumətin Səmərəliliyi Departamentinin fəaliyyətini dayandıracağını və İlon Maskın 130 gün ərzində işdən çıxarılacağını söyləyib. Tramp bazar ertəsi günü bəyan edib ki, "müəyyən bir məqamda" Hökumətin Səmərəlilik Departamentinin fəaliyyəti dayandırılacaq.

"O, idarə etməli olduğu böyük bir şirkətə sahibdir, buna görə də nə vaxtsa öz şirkətinə qayıdacaq. Mən onu bacardığım qədər burada saxlayacağam. O, çox istedadlı biridir, bilirsiniz, mən ağıllı insanları çox sevirəm. O, həqiqətən ağıllıdır və yaxşı iş görüb".

Bəs Tramp Maskı vəzifədən niyə azad edir? 

Milli.Az xəbər verir ki, siyasi ekspert Zeynal Əmrəliyevin sözlərinə görə, hələ prezident seçkiləri olmamışdan əvvəl Tramp - Mask ittifaqının çox da uzunömürlü olmayacağı deyilirdi.

"Kifayət qədər iddialı olan 2 milyarderin birlikdə ölkə idarəçiliyində iştirakı ciddi problemlərə yol aça bilərdi. Ancaq Trampa yenidən Ağ evə sahib olmaq üçün bu ittifaq lazım idi. İlk növbədə Maskın çox böyük maliyyə imkanları var. Nəinki ABŞ prezidenti seçilmək, hətta ölkədəki 2 böyük partiyadan birinin vahid namizədi olmaq üçün seçki fondunda rəqiblərdən daha çox vəsaitin yığılmasına ehtiyac var. İlon Mask Kamala Harris qarşısında Trampa maksimum dəstək verdi. Digər bir məsələ isə Maskın malik olduğu yerli və beynəlxalq əlaqələr idi. Donald Tramp seçki qabağı kampaniyası dövründə bu əlaqələrdən maksimum şəkildə istifadə etdi. Məhz Mask ölkədəki milyarderlərin əksəriyyətini Trampın ətrafında birləşdirə bildi. Üçüncü bir məqam isə İlon Maskın malik olduğu texnoloji güc idi. Trampın seçki reklamı üçün bu məsələ xüsusi əhəmiyyət daşıyırdı. Mask proseslərə arxadan da təsir edə bilərdi. Yəni onun birbaşa hökumətdə təmsil edilməsinə ehtiyac yox idi. Ancaq dünyanın ən zəngin adamı ölkə idarəetməsində söz sahibi olduğunu göstərmək üçün birbaşa vəzifə tutmaq qərarına gəldi. Təmsil olunduğu vəzifə isə ona ABŞ dövlətini öz maraqlarına uyğun şəkildə dizayn etmək imkanı verirdi".

Ekspert qeyd edib ki, Maskın aldığı qərarlar administrasiyada təmsil olunan digər nazirlərin işinə ciddi şəkildə problemlər yaradırdı.

"Heç zaman siyasətdə və dövlət işində olmamış, aldığı qərarları ancaq iqtisadi maraqlar üzərindən dəyərləndirən İlon Mask bu müddətdə dövlət qulluğunda çalışan xeyli sayda şəxsi ixtisar etdi və xeyli vəzifəni ləğv etdi. Düzdür , bunlar ABŞ büdcəsi üçün böyük üstünlük olsa da mühüm problemləri də özü ilə gətirirdi. Maskın bu qərarları ölkədə işsizlik ordusunu yaratmaqla bərabər dövlət idarəçiliyində səmərəliyin azalmasına da səbəb olurdu. Buna görə də Ağ ev rəhbəri ən böyük müttəfiqini vəzifədən hörmətlə yola salmaq barədə qərar verib. Maskın buna münasibətinin necə olacağı isə hələ ki, müəmmalıdır".

Asya
Milli.Az