Türkiyə XİN İsrailin Ankaradakı səfirindən sonra, bu ölkənin İstanbuldakı baş konsulunun da bir müddətlik ölkəsinə qayıtmasını tələb edib.
Milli.Az Hürriyet-ə istinadla xəbər verir ki, bu barədə məlumat diplomatik mənbələrdən əldə olunub.
Ötən gün İsrail XİN-i Türkiyənin Qüdsdəki baş konsulundan ölkəni tərk etməsini tələb edib.
Qeyd edək ki, Qəzzada baş verən olaylarla bağlı Türkiyənin İsraildəki səfiri Kemal Ökem də məsləhətləşmələr üçün Ankaraya çağırılıb.
Xatırladaq ki, ABŞ-ın İsraildəki səfirliyi may ayının 14-də Təl-Əvivdən Qüdsə köçürülüb. Bu, həm də İsrail dövlətinin yaradılmasının 70-ci ildönümünə təsadüf edib. Fələstinlilər ABŞ səfirliyinin Qüdsə köçürülməsi və İsrail dövlətinin yaradılması ilə bağlı Qəzza sərhədində aksiya keçirib. İsrail hərbçilərinin aksiyaçıları atəşə tutması nəticəsində 61 fələstinli ölüb, 2 min 770-dən çox fələstinli yaralanıb.
Bəxtiyar Umarlı
Milli.Az