Eyfel qülləsinin orijinal pilləkəni hərraca çıxarılır: qiymət açıqlandı

Dünyanın ən ikonik tikililərindən biri olan Eyfel qülləsinin 1889-cu ildəki açılışından qalma orijinal spiral pilləkəninin bir hissəsi sabah Parisdə keçiriləcək hərracda satışa çıxarılacaq. Bu tarixi memarlıq nümunəsini əldə etmək istəyən kolleksionerləri isə iki mühüm şərt gözləyir: alıcıların həm ciddi bir büdcəni gözdən çıxarması, həm də bu parçanı yerləşdirmək üçün kifayət qədər yüksək tavanlı bir evə sahib olması lazımdır.

Milli.Az xəbər verir ki, "1 nömrəli hissə" adlandırılan bu orijinal spiral pilləkən kəsiyi, Eyfel qülləsinin Fransa İnqilabının 100-cü ildönümü şərəfinə təşkil edilən Ümumdünya Sərgisi çərçivəsində qapılarını açdığı 1889-cu ildə qüllənin ikinci və üçüncü mərtəbələrini bir-birinə bağlayırdı.

Polad və pərçimlənmiş təbəqə metal lövhələrdən hazırlanan bu tarixi parça xaçşəkilli bünövrə üzərində bərkidilmiş 14 pillədən ibarətdir. Pilləkənin hündürlüyü 2,75 metr, diametri isə 1,75 metr ölçüsündədir. Qülləni açıldığı gündən bəri ziyarət edən təxminən 300 milyon insanın böyük bir qismi, demək olar ki, bir əsr boyunca zirvəyə dırmaşmaq üçün məhz bu pillələrdən istifadə edib. Abidənin 1983-cü ildə keçirdiyi böyük bərpa və modernizasiya işləri çərçivəsində pilləkənlərin bəzi hissələri sökülərək yerlərinə liftlər quraşdırılıb.

Məlumata görə, bu tarixi parçanın 120.000 Avro ilə 150.000 Avro (təxminən 225.000 - 280.000 AZN) arasında bir qiymətə alıcı tapacağı gözlənilir. Satıcının kimliyi gizli saxlanılsa da, "Artcurial" hərrac evi bu nadir eksponatın söküldüyü 1983-cü ildən bəri, yəni 40 ildən çoxdur ki, eyni şəxsi kolleksiyada qorunduğunu bildirib.

Hərrac evinin direktor müavini Sabrina Dolla pilləkənin vəziyyəti barədə bunları qeyd edib:

"Bu hissə heç vaxt açıq havada saxlanılmayıb və bu xüsusi satış üçün tamamilə aslına uyğun şəkildə bərpa edilib. Bu hərrac, tarixi bir abidənin parçasına sahib olmaq üçün çox nadir bir fürsətdir. Özünüzü 1889-cu ildə, heç bir təhlükəsizlik baryeri olmadan, Parisin 360 dərəcəlik mənzərəsinə qarşı, 113-276 metr hündürlükdəki bu pilləkənlərdə xəyal edin."

1983-cü ildəki söküntü zamanı pilləkənlərdən ümumilikdə 20 hissə kəsilərək satılmışdı və bu parçaların böyük bir qismi hələ də ilk alıcılarının əlindədir. Hazırda bu parçalardan ikisi Parisdəki dünyaca məşhur "Musee d'Orsay" və "Cite des Sciences" muzeylərində, digəri isə Fransanın şərqindəki "Musee de l'Histoire du Fer" (Dəmir Tarixi Muzeyi) daxilində nümayiş etdirilir.

Fransadan kənarda isə pilləkənin bəzi hissələri Yaponiyanın Yamanaşi şəhərindəki "Yoishii" Fondunun bağlarında, digəri isə Nyu-Yorkdakı "Azadlıq Heykəli"nin yaxınlığında sərgilənir.

"Artcurial" hərrac evi keçmiş illərdə də Eyfel qülləsi pilləkənlərinin fərqli hissələrini satışa çıxarıb və böyük maraqla qarşılanıb. İndiyə qədər satılan ən bahalı parça, 2016-cı ildə tam 523.800 Avroya (təxminən 980.000 AZN) alıcı tapan 13 nömrəli hissə olub. Sabrina Dolla həmin rekord satışın səbəbini yeni bir Çinli kolleksionerin bu parçanı nəyin bahasına olursa-olsun almaq istəyi ilə əlaqələndirib.

Lalə Qüdrətova
Milli.Az