Tramp Tehranda "Venesuela Modeli"nə işarə etdi: "Yeni rəhbərlik sıradan çıxarılıb"

ABŞ Prezidenti Donald Tramp Almaniya Kansleri Fridrix Mers ilə görüşündə İranla davam edən müharibənin gedişatı və Tehranın gələcək rəhbərliyi ilə bağlı beynəlxalq ictimaiyyəti düşündürən sualları cavablandırıb. Tramp hərbi əməliyyatların uğurla getdiyini bildirsə də, Tehranın yeni liderinin kimliyi ilə bağlı qeyri-müəyyənliyi saxlayıb.

Milli.Az xəbər verir ki, Tramp görüş zamanı bir daha vurğulayıb ki, ABŞ və İsrailin başlatdığı hərbi əməliyyatın əsas səbəbi İranın planlaşdırdığı "qabaqlayıcı zərbə"nin qarşısını almaq olub. Administrasiyanın bildirdiyinə görə, İran kütləvi hücuma hazırlaşırdı və bu addım "preventiv müdafiə" məqsədilə atılıb.

Tramp İranın gələcək idarəetmə forması ilə bağlı mesajlar verib. O, Venesuela ssenarisini model kimi göstərib:

Tramp yanvar ayında Venesuela lideri Nikolas Maduronun ələ keçirilməsindən sonra ölkədə mövcud dövlət strukturlarının qorunduğunu və yeni rəhbərliyin (Delsi Rodriqez) Vaşinqtonla əməkdaşlığa başladığını xatırladıb.

Tramp bildirib ki, bugünkü zərbələr zamanı "yeni rəhbərlik" üçün potensial namizəd ola biləcək 49 yüksək vəzifəli lider məhv edilib. O, gələcəkdə İranı kimin idarə edəcəyi barədə "üç yaxşı seçiminin" olduğunu desə də, konkret ad çəkməyib.

Tramp qeyd edib ki, İranın Körfəz ölkələrinə (Qətər, BƏƏ, Küveyt və s.) raket hücumları Tehranın əleyhinə işləyən ən böyük strateji səhvdir. Onun sözlərinə görə, əvvəllər İranla müəyyən səviyyədə dostluq münasibətləri olan bu dövlətlər artıq İran rejiminə qarşı kəskin mövqe nümayiş etdirirlər.

Buna baxmayaraq, ABŞ prezidenti bir narahatlığını da gizlətməyib. O, Ayətullah Xameneidən sonra hakimiyyətə gələcək şəxsin ondan daha sərt və radikal bir xətt izləyə biləcəyi ehtimalını etiraf edib. "Ən pis ssenari odur ki, biz bu qədər iş görərik, amma yerinə əvvəlki qədər pis biri gələr. Bunun olmasını istəmirik," - deyə Tramp bildirib.

Almaniya Kansleri Fridrix Mers isə görüşdə müharibənin dünya iqtisadiyyatına, xüsusilə neft və qaz qiymətlərinə vurduğu zərərdən danışıb. Mers "müharibədən sonrakı gün" barədə müzakirələrin vacibliyini qeyd edərək, sülhün və yeni hökumətin tezliklə qurulacağına ümid etdiyini bildirib.

Lalə Qüdrətova
Milli.Az