Putin Arktika üçün Trampa meydan oxudu: "Hər bir halda davam edəcəyik"

Rusiya Prezidenti Vladimir Putin ABŞ Prezidenti Donald Trampın suverenlik tələbi irəli sürdüyü Qrenlandiya və Arktika bölgəsi ilə bağlı kəskin bəyanatla çıxış edib. Putin Rusiyanın Arktikadakı maraqlarının hər hansı kənar müdaxilədən asılı olmayacağını vurğulayaraq bildirib: "Əsas məsələ odur ki, biz Arktikanın mənimsənilməsini hər bir halda davam etdirəcəyik."

Milli.Az xəbər verir ki, Moskva Fizika və Texnologiya İnstitutunun (MIPT) 75-ci ildönümü münasibətilə tələbələrlə görüşən Rusiya lideri, şimal bölgələrinin ölkə üçün strateji əhəmiyyətini qeyd edib: Şimal enlikləri Rusiya ərazisinin 70%-ni təşkil edir. Bu, ölkənin iqtisadi və təhlükəsizlik gələcəyi üçün həyati əhəmiyyət kəsb edir.

Putin qeyd edib ki, mütəxəssislər iqlim dəyişikliyi barədə fərqli fikirdədirlər - bəziləri qlobal istiləşmənin davam edəcəyini, bəziləri isə artıq soyuma dövrünün başlayacağını proqnozlaşdırırlar. Lakin hava şəraitindən asılı olmayaraq, Rusiya bölgədəki fəaliyyətini dayandırmayacaq.

Tramp Davosda NATO Baş katibi Mark Rutte ilə görüşərək Qrenlandiya və bütün Arktika bölgəsi üçün bir "razılaşma çərçivəsi" yaratdıqlarını elan edib.

Tramp əvvəlcə Danimarka və digər 7 Avropa ölkəsinə (Almaniya, Fransa, Böyük Britaniya və s.) Qrenlandiya məsələsində ABŞ-a müqavimət göstərdikləri üçün 1 fevraldan etibarən 10% gömrük rüsumu tətbiq edəcəyini bildirmişdi. Lakin Rutte ilə görüşdən sonra bu qərarını müvəqqəti dayandırdığını açıqlayıb.

Tramp Qrenlandiyanın ABŞ-nin qurmaq istədiyi yeni raketdən müdafiə sistemi üçün əvəzedilməz olduğunu iddia edir.

Trampın Arktikada "suverenlik" və "mülkiyyət" tələbləri həm Rusiya, həm də Çinin bölgədəki artan təsirinə qarşı bir həmlə kimi qiymətləndirilir. Putin isə bu iddialara qarşı Rusiyanın bölgədəki tarixi və coğrafi üstünlüyünü xatırladaraq geri addım atmayacağını nümayiş etdirir.

Lalə Qüdrətova
Milli.Az