İranda etirazların səkkizinci günü - 222 ərazidə davam edir - FOTO

İranda etiraz aksiyaları ardıcıl səkkizinci gündür davam edir.

Milli.Az xəbər verir ki, ABŞ-da yerləşən İnsan Hüquqları Fəalları Xəbər Agentliyinin (HRANA) məlumatına görə, ölkənin 26 əyalətinin 78 şəhərində ümumilikdə 222 yerdə nümayişlər, tətillər və tələbə etirazları qeydə alınıb. Toqquşmalar nəticəsində ölənlərin sayı 20-yə yüksəlib.

HRANA bildirir ki, gücləndirilmiş təhlükəsizlik tədbirləri, polis və təhlükəsizlik qüvvələrinin geniş şəkildə yerləşdirilməsinə baxmayaraq, etirazların coğrafi yayılma miqyası dəyişməz qalır. Son səkkiz gün ərzində ən azı 19 mülki şəxs və bir təhlükəsizlik qüvvəsi əməkdaşı həlak olub, 51 nəfər isə yaralanıb. Yaralıların əksəriyyətinin güllə və rezin güllələrdən xəsarət aldığı qeyd olunur.

Etirazlar ilkin mərhələdə əmək tətilləri və peşə birliklərinin aksiyaları ilə başlayıb, daha sonra geniş küçə nümayişləri, məhdud ticarət dayanmaları və rejim dəyişikliyinə çağırış edən tələbə etirazları ilə davam edib. 

Təkcə son 24 saat ərzində Tehran, Məşhəd, Şiraz, Kərəc, Qəzvin, Yəzd, Bəndər Abbas, Təbriz, Kirmanşah, Xorrəmabad, Şahrud, Dorud, Qəçsaran, Yasuc, Buşehr, Lahican, Nişapur, Məhəllət, Rudbar, Borucerd və Mərvdəşt daxil olmaqla 20-dən çox şəhərdə etirazlar baş verib. Bir sıra bölgələrdə təhlükəsizlik tədbirləri daha da sərtləşdirilib.

Etirazlar yalnız iri şəhərlərlə məhdudlaşmayıb, kiçik şəhər və qəsəbələrə də yayılıb. Bu isə aksiyaların müxtəlif sosial və coğrafi təbəqələr arasında genişləndiyini göstərir. Sosial şəbəkələrdə yayılan təsdiqlənmiş görüntülərdə təhlükəsizlik qüvvələrinin gözyaşardıcı qazdan, canlı atəşdən istifadə etdiyi və kütləvi həbslər apardığı görünür.

İran Beynəlxalq Təşkilatının məlumatına görə, ən qanlı hadisə İlam əyalətinin Məlikşahi şəhərində qeydə alınıb. Təhlükəsizlik qüvvələrinin atəş açması nəticəsində azı beş nəfər ölüb, 30 nəfər yaralanıb.Etirazlar fonunda İranın müxtəlif bölgələrində internetə çıxışda da ciddi fasilələr müşahidə olunur.

Qeyd edək ki, daha əvvəl ABŞ Prezidenti Donald Tramp "Truth Social" platformasında paylaşım edərək, İranda dinc nümayişlərin zor gücü ilə yatırılacağı təqdirdə Vaşinqtonun prosesə müdaxilə edə biləcəyini bəyan etmişdi.

Xatırladaq ki, İranda milli valyutanın ABŞ dolları qarşısında rekord həddə ucuzlaşması paytaxt Tehran və digər böyük şəhərlərdə etirazlara səbəb olub.

Fidan
Milli.Az