Ankarada qəzaya uğrayan təyyarə ilə bağlı yeni detal - Qəzadan əvvəl son mesaj... - FOTO

Ankarada Liviya hərbi nümayəndə heyətini daşıyan Falcon-50 tipli özəl təyyarənin qəzaya uğraması ilə bağlı aparılan istintaqda pilotla idarəetmə qülləsi arasındakı təcili rabitənin təfərrüatları üzə çıxıb.

Milli.Az xəbər verir ki, məlumata görə, pilot əlaqə kəsilməzdən əvvəl son dəfə  "Nasazlıq çox ciddidir" sözlərini deyib.

• Liviya Baş Qərargah Rəisini daşıyan təyyarənin düşmə Anı 

Malta Mülki Aviasiyasında qeydiyyatda olan və "9H-DFS" quyruq nömrəsi daşıyan təyyarə 25 dekabr axşamı saat 20:17-də Ankara Esenboğa Hava Limanından havaya qalxaraq Tripoliyə yollanıb. Uçuşdan 14 dəqiqə sonra, saat 20:31-də pilot idarəetmə qülləsi ilə əlaqə saxlayaraq aviasiyada təcili çağırış siqnalı sayılan "PAN-PAN" elan edib və təcili eniş tələbini bildirib.

Pilot saat 20:33-də ən yüksək riskli fövqəladə vəziyyət kodu hesab edilən 7700 kodunu aktivləşdirib, 20:35-də isə yenidən "PAN-PAN" çağırışı edib. Saat 20:36-da pilotun səsinin çətinliklə eşidildiyi, radar məlumatlarının isə qismən itirildiyi qeyd olunub. 20:38-də təyyarə ilə əlaqə tamamilə kəsilib.

Səlahiyyətli qurumların məlumatına görə, pilot təcili eniş icazəsi aldıqdan sonra marşrutu Esenboğa Hava Limanına dəyişib. Bu müddətdə Ankara hava məkanı müvəqqəti olaraq bağlanıb və eniş zolağı təyyarənin qəbulu üçün hazırlanıb. Lakin təyyarə Ankaranın Haymana bölgəsində qəzaya uğrayıb.

İlkin ehtimallara görə, təyyarə təxminən 7 dəqiqə daha havada qala bilsəydi, Esenboğaya enə bilərdi. Hadisə yerində aparılan ilkin araşdırmalar pilotun kömək istədikdən sonra təyyarəni yaşayış olmayan əraziyə endirməyə çalışdığını, lakin bu cəhd zamanı təyyarənin qəzaya uğrayaraq partladığını göstərir. Qəza yerində iri kraterin əmələ gəldiyi bildirilir.

İstintaq çərçivəsində təyyarənin nasazlığı Konya vilayətinin Kulu rayonu üzərində hiss etməsinə baxmayaraq, daha yaxın olan Konya hava limanına deyil, Ankaraya qayıtma qərarının səbəbləri də araşdırılır. Təhlükəsizlik mənbələri bildirir ki, təyyarələr adətən qalxdıqları hava limanına qayıtmağa üstünlük verirlər və Esenboğa Hava Limanının texniki imkanlarının Konya və Adanaya nisbətən daha geniş olması bu qərarda rol oynayıb.

Qəzanın səbəbləri ilə bağlı araşdırmalar davam edir. İlkin tapıntılar texniki nasazlıq ehtimalını ön plana çıxarır. Xüsusilə elektrik sistemində yaranan problem və təyyarənin sabitliyini təmin edən giroskop sisteminin nasazlığı ehtimalı araşdırılır. Mütəxəssislər qeyd edirlər ki, giroskop nasazlığı istiqamət, mövqe və dönüş göstəricilərinin yanlış işləməsinə, bu isə xüsusən gecə və məhdud görünüş şəraitində pilotajın çətinləşməsinə səbəb ola bilər.

İstintaq çərçivəsində həmçinin təyyarənin əvvəlki texniki qeydləri, icarə prosesi, pilotların təcrübəsi və uçuş tarixi də araşdırılır.

Xatırladaq ki, Türkiyəyə rəsmi səfərdən sonra ölkələrinə qayıdan beş nəfərlik Liviya hərbi nümayəndə heyətini daşıyan Falcon 50 tipli biznes təyyarəsi Ankara yaxınlığında radarlardan itib və sonradan qəzaya uğradığı müəyyən edilib. Qəza nəticəsində həyatını itirən şəxslər: Liviya Baş Qərargah rəisi Məhəmməd Əli Əl-Həddad, Ordu komandanı, general-leytenant Əl-Fayturi Qərib, Liviya Hərbi Sənayesinin rəhbəri, briqada generalı Mahmud Əl-Qətivi, Baş Qərargah rəisinin müşaviri Məhəmməd Əl-Əsəvi Diab, Baş Qərargah rəisinin fotoqrafı Məhəmməd Ömər Əhməd Mahcub.

Fidan
Milli.Az