İdman

"Rəşad Sadıqovun qədrini bilməliyik" - Qurban Qurbanov

25 Oktyabr 2019 09:57
3 Şərh     Baxış: 4 133
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Avropa Liqasının qrup mərhələsinin III turunda Bakıda Kiprin APOEL klubu ilə heç-heçə edən (2:2) "Qarabağ"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavablandırdı.

Milli.Az xəbər verir ki, 47 yaşlı mütəxəssis əvvəlcə görüş barədə fikirlərini bildirdi:

- Hamı üçün çox maraqlı oyun oldu. Həm yaxşı mübarizə var idi, həm qollar oldu. Azarkeş bunun üçün stadiona gəlir və hər birini göstərə bildik. Sadəcə, qələbə çatışmadı. Futbolçularımdan razı qaldım. Bu oyun bütün komandaya çox şey verdi. Baxmayaraq ki, hesabda geri düşdük, sona kimi soyuqqanlı çıxış etdik. Futbolçular soyuqqanlı olmağı bacardılar. Onları təbrik edirəm. Möhtəşəm azarkeşlərimiz var idi. Bu gün tam birlik gördüm.

- Futbolçularınız şansları sağa-sola xərcləyirdi və görünürdü ki, vuran ayaq yoxdu. Hücumçuların qol vura bilməməsi sizi qayğılandırmır?
- Epizodları sağa-sola xərcləmirdik. Sadəcə, rəqibin müdafiədəki oyununu nəzərə almaq lazımdı. 1-2 epizodu çıxmaqla qalan imkanlar mübarizə şəraitində olur. O halda dəqiq zərbə vurmaq asan deyil. Elə matçlar olur ki, çoxlu qol imkanlarına baxmayaraq, hansısa komanda uduzur. Yaxşı kombinasiyalar qurduq, qol epizodları yaratdıq. Mən ümidliyəm. Hücumçularımız da qol vurmağı bacarır. Bizin yalnız öndə bir futbolçumuz yox, sağ-sol oyunçularımız da var. Hər oyun hansısa futbolçu fərqlənə bilər. Daha sərrast olmaları üçün futbolçuların üzərində işləyirik. Düşünürəm ki, gələcəkdə bu baxımdan inkişaf edə biləcəklər.

- Hesabdan razı qaldız?
- Oyunun gedişatını götürsək və hesabda geri düşdüyümüzü nəzərə alsaq, razı qaldım. Bu rəqiblə son matçda çoxlu qol imkanlarına baxmayaraq, uduzmuşduq. Bu gün də oyuna nəzarət edirdik, ancaq hesabda geri düşdük və geridönüş etmək çətin idi. Başqa komandaya qarşı bəlkə də, asan olardı, ancaq bu rəqibə qarşı psixoloji çətinlik də var idi. Fasilədə danışdıq ki, hamı soyuqqanlı olmalıdı. Sona kimi hazırlaşdığımız oyunu göstərə bildik. Bu baxımdan razı qaldım.

- İkinci əvəzetməyə əl atmadız. Araz Abdullayevi meydana buraxmaq nə dərəcədə effektiv ola bilərdi?
- Oyunun gedişində düşünürdüm ki, dəyişiklik etmək olar. Ancaq elə oldu ki, buna ehtiyac duymadım. Bəzən belə matçlarda stress daha çox olur. Əsas da ilk "11-lik"də olmayan futbolçularda. Açığı, bu baxımdan ehtiyat etdim ki, oyunumuz pozula bilər. Oyuna bu heyətlə hazırlaşmışdıq.

- Səfər oyununda rəqibin açıqlacağını nəzərə alsaq, sizə daha asan olmayacaq ki?
- Burda nə qədər soyuqqanlı idiksə, səfərdə daha da soyuqqanlı olmalıyıq. Rəqib çox kobud oynayırdı. Səfərdə daha aqressiv olmalıyıq və oyun intizamını saxlamalıyıq. Bu rəqibin çox açılacağını düşünmürəm. Onların oyun üslubu belədi. Bakıdakı əvvəlki matçda fərqli çıxış etmişdilər, bu dəfə 5 müdafiəçi ilə oynadılar. Düşünmürəm ki, çox boşşluq versinlər. Hər bir imkandan istifadə etməyə çalışacağıq.

- Hansı komandanı qrupdan çıxmaq baxımından daha şanslı sayırsız?
- Hər üç komandanın şansı var. Əvvəl dediyim fikirlərimdə qalıram. Görünən odu ki, hər şey son oyunda bəlli olacaq. Bu gün öndəyiksə, çalışacağıq ki, bunu qoruyub saxlayaq. Hansısa komandanın daha şanslı olduğunu deyə bilmərəm.

- Xayme Romeronun durumu necədi?
- Ümumən pis deyil. Düşünürəm ki, səfər oyununa tam hazır olacaq.

- Rəqibin baş məşqçisi demişdi ki, oyundan sonra gülən tərəf olacaq. Səfərdə bizim gülməyimiz üçün nə lazımdı?
-
 Həmişə oyunumuzu daha da yaxşılaşdırmaq istəmişəm. Ev oyunu ilə səfər oyunu fərqli olur. Evdə çıxış edən komandanın hücum etmək şansı daha çoxdu. Bugünkü matçı da analiz edib, bir neçə əlavə variant da fikirləşəcəyik.

- Mahir Emrelini fasilədən sonra meydana buraxdız. Tam hazır deyil?
- Zədəsini tam sağaldıb. Ancaq fiziki formasından bir qədər uzaqdı. Zədədən sonra ilk oyunu idi. Start heyətində buraxmaq risk olardı. Zədəsi elədi ki, yenilənə bilərdi. Bu gün onun ayağına əmin idik. Sadəcə, performansına görə 30 dəqiqə oynamasını planlaşdırırdıq. Oyun rəqib meydanında gedirdi deyə, 45 dəqiqə şans verdik. Mahiri meydana buraxdıq ki, hücumda daha sürətli olaq.

- Sosial şəbəkələrdə azarkeşlər Rəşad Sadıqovun artıq karyerasını bitirmə vaxtının çatdığını yazırlar...
- Futbol elə oyundu ki, səhvsiz futbolçu olmur. Oyunçularımızın qədrini bilməliyik. Bir epizodla futbolçuya qiymət veririksə, bu heç də düzgün fikir deyil. Oyunu analiz etsək, tam fərqli çıxış etdi. Birinci qolda top Maksimin kürəyinə dəymişdi top. Yaxşı ki Rəşada dəyməyib, yoxsa bununla bağlı da başqa fikirlər olardı. Onun qədrini bilməliyik. Belə fikirlər məni narahat etmir. Biz futbolçularla kommunikasiyada oluruq, onlara güvəndiyimizi deyirik. Həmişə onlara tövsiyyə etmişəm ki, belə söz-shbətlər işimizə mane olmasın. Azarkşin haqqıdı, məni də istefaya çağıra bilərlər, deyə bilərlər ki, karyerasını bitirsin. Milli komandada belə şeylər olurdu. Bunu normal qarşılayırıq. Bütün fikirlərə hötmətlə yanaşıram. Emosional olaraq belə fikirlər səsləndirə bilərlər, ancaq hamısı bizimlədi.

- Statistikada böyük üstünlüyünüz var. Hansı vacibdi: nəticə, yoxsa statistika?
- Həmişə topa sahib olmağı tələb edirəm futbolçulardan. Qapıya zərbələr də çox oldu. Hər bir halda maksimum topa sahib olmalıyıq. İstər evdə, istərsə də səfərdə. Bəzən rəqib bizdən daha üstün olur. Öz oyunumuzdan geri çəkilməli deyilik. Cavab matçında da çalışacağıq ki, topa sahib olaq və qol epizodlarında daha sərrast davranaq.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.