İdman

Fazil Məmmədov Velosiped Federasiyasının prezidenti seçilib

25 Avqust 2011 20:49
Baxış: 2 101
VTB-də minimal faiz dərəcəsi ilə nağd kredit 9.9%-dən
#AZERBAİJAN
Azərbaycan Respublikası Velosiped İdmanı Federasiyasının (ARVİF) konfransı keçirilib. AzərTAc xəbər verir ki, konfransda federasiyanın prezidenti Həsən Abdullayevin səhhəti ilə bağlı istefa ərizəsinə baxılmış və xahişi qəbul olunub.

Konfransda gənclər və idman naziri Azad Rəhimov çıxış edərək Azərbaycanda idmanın həmişə inkişafda olduğunu və ölkəmizin beynəlxalq yarışlara yüksək səviyyədə ev sahibliyi etdiyini bildirib. A.Rəhimov vurğulayıb ki, Azərbaycanın velosiped idmanı növündə böyük uğurları olmasa da, ölkə çempionatları, turnirlər və respublikanın müxtəlif rayonlarına yürüşlər təşkil olunur: "Çox sevindirici haldır ki, ölkəmizdə Velosiped İdmanı Məktəbi fəaliyyət göstərir və yeni idmançılar yetişir. Azərbaycanın bir idman ölkəsinə çevrilməsi üçün yalnız ənənəvi idman növlərinin inkişafına önəm verilməməlidir. Digər idman növlərinin də inkişafı ölkəmizin uğurlarının gələcəyindən xəbər verir".

Sonra ARVİF-in yeni prezidentinin seçilməsinə başlanıb. Vergilər naziri Fazil Məmmədov konfrans iştirakçıları tərəfindən yekdillikə federasiyanın yeni prezidenti seçilib.

F.Məmmədov göstərilən etimada görə konfrans iştirakçılarına öz təşəkkürünü bildirib. "Bu, mənim rəhbərlik edəcəyim ilk federasiya deyil. Hər bir federasiyanın öz xüsusiyyəti və ənənələri var. Çalışacağam ki, Azərbaycan velosipedçiləri digər idman növlərində qazanılan uğurların davamını gətirsinlər. Ölkəmizdə idmançılar üçün çox gözəl şərait yaradılmışdır. Bunun üçün Azərbaycan Prezidenti, Milli Olimpiya Komitəsinin rəhbəri İlham Əliyevə öz təşəkkürümü bildirirəm", - Velosiped Federasiyanın yeni prezidenti deyib.

Qeyd edək ki, Fazil Məmmədov ARVİF ilə yanaşı, Azərbaycan Güləş və Otüstü Xokkey federasiyalarının da prezidentidir.

Milli.Az
Milli.Az - Xəbər Portalı
Azernews Newspaper

DİGƏR XƏBƏRLƏR

XƏBƏR LENTİ

Copyright © 2026 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.