İdman

"Həmin anda da hiss etdim ki, qol vura bilərəm" - Elvin Yunuszadə

10 Mart 2018 23:32
0 Şərh     Baxış: 901

"Qarabağ"ın futbolçusu Elvin Yunuszadə evdə "Zirə"ni 2:0 hesabı ilə yendikləri Azərbaycan Premyer Liqasının XIX tur matçından sonra jurnalistlərin suallarını cavablandırıb.

Milli.Az "Report"a istinadən bildirir ki, qollardan birinin müəllifi olan təcrübəli müdafiəçi öncə oyunu dəyərləndirib...

- Düzdür, cari mövsümdə "Zirə" ilə oyunlarımızda bir heç-heçə, 2 qələbə qeydə alınıb. Lakin bu komandaya qarşı oyunlarımız həmişə çətin olur. Bu gün doğrudan da çox əziyyət çəkdik, işlədik. Çalışdıq ki, baş məşqçimizin tapşırıqlarını maksimum yerinə yetirək. Əsas 3 xal idi. Hər oyun bizim üçün çox vacibdir. Hamımız görürük ki, çempionatda asan oyun yoxdur. İstər "Sumqayıt", istərsə də "Kəpəz"lə qarşılaşmalarda çətinliklə üzləşdik. Artıq bu görüşü bir kənara qoymaq, "Neftçi" ilə növbəti oyuna hazırlaşmaq lazımdır. Bizi doğrudan da çox çətin oyun gözləyir.

- "Zirə" heç vaxt "Qarabağ"ı məğlub etməsə də, bu gün daha rahat qələbə qazandınız. Arada səviyyə fərqi var, yoxsa...?

- Yox, belə deməzdim. "Zirə" də yaxşı futbolçulardan qurulmuş komandadır. Kənardan bəlkə asan görünə bilər. Hesaba baxıb belə demək mümkündür. Amma daxildə nə qədər əziyyət çəkdiyimizi görürük. Biz də onlara qarşı maksimum dərəcədə hazırlaşırıq. Ona görə də hər oyunda qalib gəlməyə çalışırıq.

- Təslim olan təkcə "Zirə" deyil. Artıq "Qəbələ" də silahı yerə qoyub...

- Biz belə düşünsək, özümüzlə düşmənçilik etmiş olarıq. İndidən boşalmaq, rahatlaşmaq olmaz. Bir az boşalsaq, bu, özünü dərhal nəticədə göstərəcək.

- Adətən, müdafiəçilər standart vəziyyətlərdə irəli çıxırlar. Lakin sən oyun epizodunda hücuma getmişdin. Bu, əvvəlcədən baş məşqçinin göstərişi idi, yoxsa özün alışıb-yanırdın?

- Bəzi epizodlarda sola baxıram, bir gözüm Qurban müəllimdə olur. Bir dəfə işarə etsə, rahatca irəli gedirəm. Həmin anda da hiss etdim ki, qol vura bilərəm. Ona görə də geri qayıtmadım. Sevinirəm ki, qol vuraraq, komandama az da olsa, xeyir verdim.

- Demək olarmı ki, "Qarabağ"da ən yaxşı oyununu keçirdin?

- Mən heç nə deyə bilmərəm. Yaxşı tərəflərimə yox, səhvlərimə baxmalıyam. Bunu Qurban Qurbanov daha yaxşı bilər.

- Keçmiş komandan "Neftçi"yə qarşı da oynayacağını düşünürsən?

- Can-başla hazırlaşacağam. Baş məşqçimiz şans versə, çıxıb oyayacağam.

Milli.Az

loading...

Şərh yaz:

0 Şərh:

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.