Azərbaycan Premyer Liqasının XVI turu 4 futbolçunun cəzalı duruma düşməsi ilə nəticələnib.
Milli.Az apasport.az-a istinadən xəbər verir ki, üç oyunçu sarı vərəqə limiti, bir futbolçu qırmızı vərəqə üzündən növbəti turu buraxmalı olacaq.
Ən böyük zərbə "Neftçi"yə dəyib. "Sumqayıt"a 0:2 hesabı ilə uduzan bakılılar iki üzvünü itirib. Meydandan qovulan Rəşad Sadıqov ən azı bir qarşılaşmanı buraxacaq. "Zirə" ilə XVII turun matçında İlkin Qırtımov da oynaya bilməyəcək. O, mövsümdə 7-ci vərəqəsini alıb ki, bunlardan biri qırmızı, ikisi isə buna səbəb olan sarılardı. Həmin görüşün cəzasını çəkmiş Qırtımov digər vərəqələrdə 4-ə çatdığı üçün bu duruma düşüb. "Neftçi"də ilk xəbərdarlığını alan İlkin digər vərəqələri "Keşlə"nin heyətində görüb.
"Qəbələ" Qismət Alıyevin xidmətindən məhrum olub. "Zirə"ylə qarşılaşmada özünün 4-cü xəbərdarlığını alan gənc futbolçu XVII turun "Səbail"lə görüşündə istirahət edəcək.
"Qəbələ"ylə matçda önündə sarı vərəqə görən Milan Duriç də cəzalı duruma düşüb. "Zirə"nin legioneri 4-cü dəfə xəbərdarlıq aldığı üçün "Neftçi"yə qarşı oynaya bilməyəcək.
Milli.Az