Tedesko istədi: "Fənərbağça" dünya ulduzunu GƏTİRİR

"Fənərbağça" qış transfer dönəmi üçün "8 nömrə" axtarışlarını davam etdirir. Klub rəhbərliyi bu mövqeyə yeni adlar üzərində işləyərkən, baş məşqçi Domeniko Tedesko gözlənilməz bir futbolçunun adını gündəmə gətirib.

Milli.Az Türkiyə mətbuatına istinadən xəbər verir ki, italiyalı mütəxəssis rəhbərlikdən "Bayern Münhen" in yarımmüdafiəçisi Leon Qoretskanın durumunun araşdırılmasını istəyib. Tedesko bildirib ki, əgər transfer üçün şərait yaranarsa, futbolçu ilə şəxsən danışmağa hazırdır.

 Qoretska yenidən Tedesko ilə birləşə bilər

Tedesko 2017-2018 mövsümündə "Şalke" klubunu çalışdırarkən Qoretska komandanın ən önəmli oyunçularından biri olub. Alman futbolçu həmin mövsümdə 29 rəsmi oyunda 4 qol və 5 asistlə yadda qalıb və həmin uğurlu çıxışının ardından Bayern Münhenə transfer olunub.

Hazırda 30 yaşlı yarımmüdafiəçi Münhen klubunda əsas heyətdəki yerini itirib. Bu mövsüm 8 oyunda meydana çıxan Qoretska cəmi 446 dəqiqə oynayıb. Bildirilir ki, Bayern Münhen onun iyunda başa çatacaq müqaviləsini yeniləməyi planlaşdırmır.

Tedesko: "Komandamıza böyük töhfə verər"

Türkiyə mətbuatının məlumatına görə, Tedesko rəhbərliklə söhbətində belə deyib:

"Qoretskanın durumuna baxaq. Əgər Bayern Münhen onu mövsüm bitmədən buraxmağa razı olsa, mən də onunla danışaram. Keyfiyyəti və təcrübəsi ilə bizə çox şey qazandıra bilər."

Futboldan məsul idarəçi Ertan Torunoğulları və futbol direktoru Devin Özekin bu istiqamətdə ilk addımları atacağı bildirilir.

Qoretska: "Tedesko mənim üçün çox önəmli idi".

Leon Qoretska 2021-ci ildə verdiyi bir müsahibədə Domeniko Tedesko haqqında belə danışmışdı:

"Şalke"də oynayarkən Tedesko mənim üçün çox önəmli bir məşqçi idi. Xüsusilə taktiki baxımdan məni çox inkişaf etdirdi. Onunla birlikdə olduqca uğurlu bir mövsüm keçirdik və liqanı ikinci yerdə tamamladıq".

Əgər Bayern Münhen yanvarda satışa "yaşıl işıq" yandırsa, "Fənərbağça"nın bu transfer üçün ciddi addım atacağı gözlənilir.

Tural
Milli.Az