"Fənərbağça"da heyətdən çıxarılan Kahveci əzəli rəqibə keçir?

"Fənərbağça" klubunun rəsmi saytında bir neçə gün öncə verilən açıqlamada komandanın iki futbolçusu - İrfan Can Kahveci və Cenk Tosunun əsas heyətdən uzaqlaşdırıldığı bildirilib.

Milli.Az Türkiyə mətbuatına istinadən xəbər verir ki, qərarın səbəbi açıqlanmasa da, hadisənin pərdəarxası detalları və futbolçunun gələcəyi böyük maraq doğurub.

İddialara görə, bu qərarın səbəbi "Samsunspor"la 0:0 hesabı ilə başa çatan görüşdən sonra yaşanan gərginlikdir. Bildirilir ki, matçın ardından İrfan Can Kahveci ilə komanda yoldaşı Archie Brown arasında mübahisə düşüb. İrfan Can oyundakı xal itkisinə görə narazılığını bildirərkən, Arçi Brovn buna sərt reaksiya göstərib.

Milli komanda düşərgəsindən zədə səbəbindən ayrılan Kahveciyə qərarın xəstəxanada olduğu vaxt bildirildiyi və futbolçunun bu xəbərdən şoka düşdüyü qeyd olunur. O, yaxın çevrəsinə məsələni ailə daxilində həll edilə biləcək bir gərginlik kimi gördüyünü, belə bir hadisənin komanda daxilində yaşanmasının normal olduğunu deyib.

Bununla belə, "Takvim" nəşrinin məlumatına görə, hadisədən sonra "Beşiktaş" yenidən hərəkətə keçib. Qara-ağlı klubun 30 yaşlı futbolçu ilə maraqlandığı və vəziyyəti yaxından izlədiyi bildirilir. Məlumata əsasən, "Beşiktaş" yanvar ayında İrfan Can Kahveci üçün rəsmi təklif verməyə hazırlaşır.

Hazırda futbolçunun transfer dəyəri 6 milyon avro civarındadır. O, "Fenerbahçe" ilə 30 iyun 2028-ci ilə qədər müqaviləyə malikdir. Lakin son hadisələr transferin qarşısını açan əsas amillərdən biri ola bilər.

Xatırladaq ki, yay transfer dönəmində də İrfan Can Kahveci ilə "Beşiktaş" arasında danışıqların aparıldığı iddia olunmuşdu. Həmin vaxt futbolçunun "Fənərbağça"də qazandığı illik 3 milyon avroluq maaş müqabilində "Beşiktaş" təklifinə müsbət yanaşa biləcəyi bildirilmişdi, lakin bu xəbərlər sonradan təkzib edilmişdi.

Hazırkı vəziyyətdə isə "Beşiktaş"ın bir daha İrfan Can üçün hərəkətə keçməsi Türkiyə futbolunda ən çox müzakirə olunan mövzulardan birinə çevrilib.

Tural
Milli.Az