"Çoxu səndən, məndən yaxşı yaşayır" - Dilənçilikdə YENİ METOD - VİDEO - FOTO

Əlində dərman resepti ilə xəstəyəm deyən "dilənçilərə" insanların çox olduğu yerlərdə və avtomagistralların kənarında rast gəlmək olar. Əksər hallarda əlində həkim resepti olan belə insanlar özünün və ya ailə üzvünün ağır xəstəlikdən əziyyət çəkdiyini deyir. Bu yolla pul qazanmağa çalışırlar.

Milli.Az bildirir ki, ARB TV-nin "Günə doğru" proqramı mövzuyla bağlı maraqlı süjet hazırlayıb.

Sakin: "Bəziləri var ki, görürsən, həqiqətən, xəstədir. Mən ona həmişə pul verirəm. Ancaq görürəm ki, bəziləri özünü yalandan xəstəliyə qoyur. Ona mən pul vermirəm".

Sakin: "Çoxusu dilənçi adı ilə baxırsan ki, səndən yaxşı yaşayır".

Ekspertlərin sözlərinə görə, bu, insanların yeni dilənçilik metodu, bir növ fırıldaqdır. Çünki bəzi hallarda həmin şəxslər, əlindəki kağıza baxmaq, dərmanları almaq təkliflərinə etiraz edirlər, resepti gizlətməyə çalışırlar.

Əhməd Qəşəmoğlu - Sosioloq: "Bir qız uşağı özünü qoyur lallığa və yazır kağıza anama kömək edin. Anam ağır xəstədir. Avtobusda belə şeylər olur. Bir tərəfdə kimsə özünü vurub çolaqlığa və o tərəfdən polis gələndə durub qaçırlar".

Psixoloqlar isə deyirlər ki, bu cür insanlar hətta müəyyən kurslara da cəlb olunurlar. Həmin kurslarda insanları aldadıb, pul yığmağın yolları öyrədilir.

İlhamə Hüseyinli - psixoloq: "Bu cür insanlara cəmiyyətə özünü necə yazıqlatmaq lazım oldugunu öyrədirlər. Gözləri ilə necə problemli olduğunu göstərməyə çalışmağı öyrədirlər. Yəni bütün insanların bu dələduz adamların emosiyalarını jestlərlə bunların hamısı öyrədilir. Sonra bunlar düşür şəhərə və dilənməyə başlayırlar".

Hətta iddialara görə, belə kurslarda bəzi psixoloqlardan da istifadə edirlər.

İlhamə Hüseyinli - psixoloq: "Bizim kolleqalarımızın da arasında belə insanlar var ki, yəni onlar da bunlara kömək edirlər. Təbii ki, ordan müxtəlif məbləğ alırlar".

Ehtiyacı olmadığı halda dilənçilik edən, bu yolla insanların pulunu mənimsəyən şəxslər etdiyi əmələ görə məsuliyyət daşıyırlar.

Samir Qasımov - vəkil: "Həmin vətəndaşlara xəbərdarlıq edilir. Əgər xəbərdarlıq kifayət deyilsə, artıq bu insan bir neçə dəfə yaxalanıbsa, hətta onu 10 günə qədər həbs edə bilərlər. Əgər bu işə yetkinlik yaşına çatmayanları cəlb edibsə, onda hətta 15 günə qədər həbs oluna bilər".

Ekspertlər hesab edirlər ki, şəhərdə belə mənzərənin artması mənfi haldır. Tədbirlər görülməsi, dilənçilik kimi halların nəzarət altına alınması mütləqdir.

Milli.Az

Videonu izləmək üçün şəklə klikləyin: