İstanbulda Hüseyn Cavid adına məktəb hansı zərurətdən yarandı? - VİDEO - FOTO

Bir gün Türkiyənin İstanbul şəhərində televiziya verilişlərin birində bir erməninin 16 nəfər məktəbyaşlı uşağı toplayıb, savadsız qalmasınlar deyə, dərs keçdiyini gördüm. Bu mənzərə məni çox təsirləndirdi, həm də necə deyərlər, silkələdi və düşünməyə vadar etdi. Həmin andan etibarən mənim bu sahədə araşdırmalarım başladı...

Müsahibimiz İstanbulda fəaliyyət göstərən "Azərbaycan, Azərbaycan Təhsil, Mədəniyyət və Sosial Həmrəylik" Dərnəyi nəzdində fəaliyyət göstərən Hüseyn Cavid adına məktəbin direktoru Şərqiyyə Məmmədovadır.

- Şərqiyyə xanım İstanbulda rəhbəri olduğunuz məktəb hansı zərurətdən yarandı?

- Əvvəla onu qeyd edim ki, mən 44 ildir ki, bir gün də fasilə vermədən orta, orta ixtisas və ali təhsil sisteminin bütün pillələrində fasiləsiz olaraq çalışmışam. Müəllim olmaqla bərabər, həm də ictimai fəaliyyət göstərmişəm. Azərbaycan Respublikası Qadınlar Şurasında sədr müavini, Bakı Şəhəri Qadınlar Şurasının sədri, Azərbaycan Əsgər Anaları Komitəsində sədr müavini vəzifələrində çalışmışam. Hər zaman da bir müəllimə olaraq millətin və dövlətin təməli saydığım insan kapitalının formalaşmasında, məktəblilərimizin, gənclərimizin layiqli vətəndaş olaraq formalaşmasında, həyata hazırlanmalarında fədakarcasına səy göstərmişəm. Yetişdirdiyim, həyata hazırladığım minlərlə ləyaqətli insan bu gün mənim qürur mənbəyimdir.

Hazırda Azərbaycanda "Maarifçi Qadınlar'' İctimai Birliyinin sədriyəm. 2013-cü ildə "Azərbaycan Maarifçi Qadınlar'' İctimai Birliyini təsis etdikdən sonra təhsil sahəsində ictimai fəaliyyətimi daha da gücləndirdim.

Hal-hazırda "Maarifçi Qadınlar'' İctimai Birliyinin sədri olaraq Azərbaycan Respublikasının Prezidenti yanında Qeyri Hökümət Təşkilatlarına Dövlət Dəstəyi Şurasının elan etdiyi Qrant müsabiqələrində layihə rəhbəri olaraq təhsillə bağlı layihələrin qalibi oluram. Həmin tarixdən həyata keçirdiyim bütün layihələr qalib olub. Təhsil sahəsindəki fəaliyyətimi həyat fəaliyyətimdən başqa, həm də bir ziyalı və müəllim olaraq vicdan borcum hesab edirəm.

İstanbuldakı rəhbəri olduğum məktəbin yaranma zərurətinə gəldikdə isə, onu deyə bilərəm ki, ani bir təsadüfdən məni düşündürən zərurət yarandı. Bir gün Türkiyənin İstanbul şəhərində televiziya verilişlərinin birində bir erməninin 16 nəfər məktəbyaşlı uşağı toplayıb, savadsız qalmasınlar deyə, dərs keçdiyini gördüm. Bu mənzərə məni çox təsirləndirdi, həm də necə deyərlər, silkələdi və düşünməyə vadar etdi. Həmin andan etibarən mənim bu sahədə araşdırmalarım başladı.

İpucu axtarmağa - İstanbuldakı həmvətənlərimin kompakt yaşadığı bölgələri öyrənməyə cəhd etdim. Müəyyən ünvanları tapıb istanbula səfər etdim. İstanbulda minlərlə soydaşımızın hərf, rəqəm tanımadan, oxuma-yazma bilmədən, həyatlarına davam etdiklərinin şahidi olduqdan sonra bütün aidiyyatı dövlət qurumlarına "Maarifçi Qadınlar'' Birliyinin rəhbəri olaraq məktub yazıb, vəziyyəti izah etməyə çalışdım.

Müxtəlif ünvanlara yazdığım məktubların hamısı Azərbaycan Respublikasının Təhsil Nazirliyinə göndərilirdi. Hörmətli nazirimiz Ceyhun Bayramov təhsil nazirinin müavini olarkən onunla 2-3 dəfə bu məsələ ilə bağlı görüşümüz olub.

Söz etdiyimiz soydaşlarımız 90-cı illərin əvvəllərindən etibarən mənfur qonşularımız tərəfindən məcburən cəlb edildiyimiz müharibənin zorluqlarından əziyyət çəkərək, qardaş Türkiyənin İstanbul şəhərinə köç etmiş vətəndaşlarımızdır. Onların bir qismi bu ölkəyə gələrkən qanuni yollarla yaşamaq hüququ əldə etsə də, əksəriyyəti maddi vəziyyətlərinin imkan verməməsindənmi, qanunları bilməmələrindənmi - qanuni yaşamaq hüququna sahib ola bilmədikləri üçün qeydiyyatsız yaşamağa davam ediblər. Nəticədə bu gün hərbi xidmətə çağrılan gənc adını, soyadını yaza bilmir. Bir nəslin hələ də cahil, savadsız böyüdüyünün şahidi olduq.

Azərbaycanın dövlət qurumları da xarici ölkədəki əməkçi miqrantların övladlarına bu ölkədə məktəb açmaq məsələsində müəyyən çətinlliklərlə üzləşdiyindən, bu vəziyyət davam etməkdə idi.

Mən 45 illik pedaqoji fəaliyyətimə, müəllimlik təcrübəmə güvənərək bütün elmi fəaliyyətimi zəiflədərək, İstanbulda məktəb açmağa qərar verdim. Hafizəmdə artıq bu layihənin sxemini hazırlamışdım. Hansı yolla olursa-olsun, bunu etməli idim!

Niyyəti gözəl olanların yolunda Tanrının məşəli yanır. Mənim də bu çətin və məşəqqətli yolda yardımcım uca Tanrı və ailəm oldu. Bələd olmadığım İstanbul, tanımadığım insanlar... O qədər çətin anlarım, günlərim olub ki, bunu yazmaq, ifadə etmək bir romanın mövzusudur.

İki illik get-gəldən sonra "Azərbaycan Təhsil Mədəniyyət və Sosial Həmrəylik'' dərnəyi qurdum. Dərnəyin nəzdində vətəndaşlarımıza təhsil vermək üçün Türkiyə dövlətindən qanuni icazə əldə edildi. Dediyim kimi- çox çətin oldu, amma oldu.

- Məktəb Dərnəyin nəzdində fəaliyyət göstərir?

- Bəli, məktəbi dərnəyin nəzdində açdıq. İdarə heyətinin qərarı ilə məktəbdə böyük dramaturq, şair, filosof, görkəmli pedaqoq, türkçülük ideologiyası uğrunda həyatını qurban vermiş Hüseyn Cavidin adını verdik.

- Bu gün məktəbə dəstək olan varmı?

- Bəli var. Azərbaycan Respublikasının Təhsil Nazirliyi şagirdlərimizi pulsuz dərsliklərlə, şagirdin şəxsi işi ilə, sinif jurnalları ilə və digər tədris ləvazimatları ilə təmin edir. Dərsliklər dövlət hesabına İstanbula təyyarə ilə gətirilir.

Diaspora ilə iş üzrə Dövlət Komitəsinin sədri Fuad Muradovun göstərişi ilə məktəbimizə elektron lövhə verilib.

Millət vəkili Adil Əliyevin dəstəyini xüsusi qeyd etmək istəyirəm. İki dəfə məktəbimizə gəlib, uşaqlarla görüşüb, maddi və mənəvi dəstək olub.

Biz də şəkildə gördüyünüz bu gözəl balaların timsalında dilimizin gözəlliklərini, tariximizi, ədəbiyyatımızı, mədəniyyətimizi, əxlaqi-mənəvi dəyərlərimizi yaşatmağı, qardaş ölkədə Vətənimizi, millətimizi ləyaqətlə təmsil etməyi qarşımıza məqsəd qoymuşuq.

Biz bu gül balaları, körpə fidanları təhsilə cəlb etməklə onları qoruma altına aldıq. Müxtəlif cinayətkar dəstələrə qoşulmaqdan, insan alveri qurbanı olmaqdan xilas etdik. Aralarında çox istedadlı uşaqlar var. Onları düzgün istiqamətləndirməliyik.

Biz böyük bir millətin övladları - C.Məmmədquluzadənin, M.Ə.Sabirin, M.T.Sidqinin, H.Cavidin, H.Zərdabinin və başqa maarifpərvər ziyalıların varisləriyik. Yolumuz elm, təhsil yoldur. Onların müqəddəs işinin davamıdır. Həm də Vətən, millət, Allah qarşısında, həm də vicdan qarşısında borcumuzdur.

Elnur Eltürk
Milli.Az
 

Videonu izləmək üçün şəklə klikləyin: