Cəmiyyət

Kiyevdə Şərq Tərəfdaşlığı və Mərkəzi Asiya ölkələrinin ikinci iclası keçirilib

24 İyul 2017 11:05

Baxış: 573

#CƏMİYYƏT

Kiyevdə Şərq Tərəfdaşlığı və Mərkəzi Asiya dövlətlərinin aviasiya administrasiyalarına dəstək layihəsi üzrə işçi qrupunun ikinci iclası keçirilmişdir. İclasda Azərbaycan Respublikası Dövlət Mülki Aviasiya Administrasiyasının nümayəndələri iştirak etmişdirlər.

Azərbaycan Respublikası Dövlət Mülki Aviasiya Administrasiyasının mətbuat xidmətindən Milli.Az-a verilən məlumata görə, işçi qrupunun ilk görüşü ötən ilin iyul ayında Kişinyovda keçirilmişdi. Layihə Avropa İttifaqı Şurası tərəfindən maliyyələşdirilir və 4 il müddətinə nəzərdə tutulmuşdur. Layihənin əsas məqsədi dayanıqlı mülki aviasiya administrasiya sisteminin təmin olunmasında iştirakçı dövlətlərin aviasiya qurumlarına yardım göstərilməsi, habelə uçuşların təhlükəsizliyi və aviasiya təhlükəsizliyi sahəsində qaydaların Avropa standartları ilə harmonizasiyasıdır. Layihəyə həmçinin yük və poçt aviasiya təhlükəsizliyi komponenti da daxil edilmişdir.

İclasda ötən il ərzində görülən işlər barədə məlumat verilmiş, proqram çərçivəsində gələcək addımlar müzakirə olunmuş və EASA komandası tərəfindən hər bir iştirakçı dövlət üçün işlənib hazırlanmış təlim layihələri nəzərdən keçirilmişdir.

Müzakirələr zamanı xüsusi diqqət Avropa qaydalarının iştirakçı dövlətlərin milli qanunvericiliyi ilə adaptasiyası, qərb və şərq aviasiya texnikasının birgə istismarına imkan verən qaydalar, pilotsuz uçuş aparatlarının ("dronlar") əməliyyatlarının tənzimlənməsi və qeydiyyatı üzrə qaydaların işlənib hazırlanması, həmçinin dövlətlər tərəfindən uçuşların təhlükəsizliyinin təmin olunmasının yoxlanılması üzrə İCAO-nun universal proqramı çərçivəsində aşkar edilmiş nöqsanların aradan qaldırılması sahəsində iştirakçı dövlətlər arasında məlumat və təcrübə mübadiləsinə yetirilmişdir.

Milli.Az