Cəmiyyət

Kombi alarkən diqqət edilməli vacib məqamlar

17 İyul 2017 22:37
1 Şərh     Baxış: 1 155

Kombi mənzilinizin istilik və isti su ehtiyacını ödəyərək rahatlığınızı təmin edən cihazdır. Kombi sistemi vasitəsilə istənilən hava şəraitində istənilən mənzili isitmək və isti su ilə təmin etmək mümkündür. Bunun üçün sistemin bütün hissələrini tələb olunan qaydada yığmaq, qapalı və bütün otaqları əhatə edən su borularını çəkmək və cihaza qoşmaq kifayətdir. Nəzərə alın ki, bu cihazları qidalandıran təbii qaz və su xəttinin layihəsi müvafiq icra orqanı tərəfindən təsdiq edilməlidir. Təbii qaz və su xətləri birləşdiriləndən sonra kombi elektron idarəetmə sistemi vasitəsilə suyu tələb olunan dərəcəyə qədər qızdırır və sistemə vurur.

Kombilər yay və qış rejimində işləyir. Yay rejimində cihaz ancaq suyu isidir. Qış rejimində isə kombi suyu isitməklə yanaşı, isidilmiş suyu istilik radiatoruna verir. Kombi ölçüləri kiçik, çəkisi yüngül, az yer tutan, asan daşına bilən və səssiz işləyir.

Milli.Az xəbər verir ki, İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətindən AZƏRTAC-a bildiriblər ki, istehlak bazarında hazırda bir sıra xarici ölkələrdə istehsal olunmuş üç növ kombilər satılır. Bu sırada bacalı, hermetik və kompressor-kondensatorlu kombilər yer alır. Bacalı kombilər - yanma əsasında lazım olan oksigeni alır və yanma sonunda lazımsız qazları, uyğun baca vasitəsilə xaric edir. Bu halda bacaların müəyyən olunmuş standartlara uyğun olması çox önəmlidir. Hermetik kombilər - yanma üçün istifadə olunan hava ventilyator vasitəsilə xarici mühitdən alınır və yanma sonrası ortaya çıxan tullantı qaz eyni sistemlə xaricə atılır. Bu halda otağın havasını dəyişməyə ehtiyac olmur. Çünki yanma üçün otağın havasından istifadə olunmur. Kompressor-kondensatorlu kombilər təbii qaz yandırdığı zaman böyük miqdarda su buxarı əmələ gəlir. Bu növ kombilər əmələ gəlmiş buxarın enerjisini hərəkət etdirir və enerji əldə edildikdən sonra kondensator buxarını kənara atır. Adi kombilərdə istifadə olunan istilik 80-90 faiz təşkil edirsə, kompressor-kondensatorlu kombilerdə bu 105-109 faiz olur.

Kombini seçəndə evin sahəsini, cihazın gücünü, qızdırıcı cihazlarının sayı və növünü nəzərə almaq vacibdir. Birinci növbədə, necə bir mal alacağınız haqqında araşdırma aparın. Tövsiyə edilən cihazın tutumunun onu istifadə edəcəyiniz yer üçün məqbul olub-olmadığı haqqında məlumat əldə edin. Bu cihazları seçərkən tanınmış istehsalçı firmaların məhsullarına və geniş texniki xidmət şəbəkəsi olanlara üstünlük verin. Eyni zamanda, kombi alarkən seçdiyiniz kombinin qiyməti ilə yanaşı, onun yanacaq sərfi və xidmət xərclərinin də əhəmiyyətli olduğunu unutmayın.

Kombilər ücün verilən zəmanət müddətinə və sertifikatının olub-olmamasına diqqət edin. Kombi üçün zəmanət müddəti istehsalçı tərəfindən müəyyən edilir. Lakin belə müddət yoxdursa qanunvericiliyə görə o ən azı 2 il zəmanətli sayılır.

Kombilər qüvvə və konturların sayına görə də fərqlənirlər. Onların gücü 12kVt-dan 35 kVt-dək qalxa bilər və müvafiq olaraq 50 kvadratmetrdən 350 kvadratmetrədək sahəni qızdırır və isti su verir.

Konturların sayına gəlincə, bir konturlu kombilər yalnız mənzillərin isidilməsi üçün istifadə olunur, iki konturlu kombilər isə istilikdən əlavə isti suyun verilməsini təmin edir.

Kombi sistemlərinin müsbət cəhətlərinə rahat və uzunmüddətli istifadəni, suyun dərəcəsinin müstəqil fərdi formada idarə olunmasını, istənilən vaxt sistemin yandırılıb-söndürülməsinin mümkünlüyünü aid etmək olar. Mənfi cəhəti isə şaxtalı havada ayrı-ayrı sahələrdə sistemdə olan suyun buzlanma riskinin olmasıdır ki, bu da ciddi qüsurlarla nəticələnə bilər.

Yeni nəsil kombi cihazlarında təhlükəsiz istifadə baxımından demək olar ki, bütün qabaqlayıcı tədbirlər nəzərə alınıb. Lakin bütün hallarda istifadə zamanı mütəmadi nəzarət olunması vacibdir. Bilin ki, kombinin davamlı işlədiyi mənzildə yetərli istilik yoxdursa, deməli ya onun tutumu aşağıdır, ya da mənzilinizin istilik izolyasiyası lazımi səviyyədə deyil. Burada, eyni zamanda, istifadə edilən radiatorun həcminin az olması və xətlərdə müəyyən problemlərin olması da rol oynaya bilər.

Bu cihazlar idxal malı olduğuna görə istehlakçılar əksər hallarda onlarda qüsur yarandıqda hara müraciət etmələri barədə çaşqınlıq yaşayırlar. Bilin ki, bu cihazların istifadəsi zamanı ortaya çıxan problemlərlə bağlı birinci növbədə onu aldığınız ticarət obyektinə müraciət edə bilərsiz. Əgər problem aradan qaldırılmazsa, onda aidiyyəti üzrə müvafiq dövlət qurumlarına müraciət edərək istehlakçı hüquqlarınızın təmin olunmasını mövcud qanunvericiliklə tələb edə bilərsiz.

Kombi alarkən istehlakçılar tərəfindən aşağıdakı bir sıra vacib məqamlara əməl olunmalıdır. Birinci növbədə, bu malları alarkən satıcı tərəfindən onların komplektliyinə, keyfiyyətinə, mal və istehsalçısı haqqında məlumatın mövcudluğuna diqqət edilməlidir. Hər bir istehlakçı bilməlidir ki, satış üçün təqdim olunan analoji mal nümunələri ticarət zalında yerləşdirilərkən, onların üzərində malın adı, markası, modeli, qiyməti olan yarlığı, habelə malların texniki xüsusiyyətlərini əks etdirən qısa annotasiyası olmalıdır. Satıcı istehlakçının tələbi və iştirakı ilə həmin malların iş prinsipinin, standartlara uyğunluğunun əyani nümayiş etdirilməsinə, malın keyfiyyəti, komplektliyi haqqında zəruri məlumatların verilməsinə, mala aid sənədlərin təqdim edilməsinə borcludur. Bu malları alarkən onunla bərabər istehsalçı tərəfindən hazırlanmış texniki pasport və ya onu əvəz edən sənədlər, satış yeri və tarix göstərilməklə, istismar üzrə təlimatlar və s. sənədləri almağı unutmayın. Bu cihazları alarkən onun texniki parametrləri, təhlükəsiz istifadə şərtlərinə aid ətraflı məlumatlarla tanış olun. Kustar üsulla hazırlanmış təhlükəsizlik tələblərinə cavab verməyən cihazları almayın.

Milli.Az

Şərh yaz:

1 Şərh:

  • Anonim
    QQ · 18 İyul 02:2100

    Bizde IMEERQAZdir .Cox yaxsi da isidir .Ancaq iki hefte olar ki suyun tezyiqini tenzimleyen qurgu qoydurmysuq su turbasina .Ondan sonra sanki su bogulub .Saygac dayanib .Kombinin tezyiqini 2ye qaldirmisiq yene isitmir .Yeqin bilirem ki sutenzimleyicinin fesadidir .Gerek tzlikle hemin santexnika ustasini tapib o qurgunu deyisdirtditek .

    Cavab yaz

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.