Cəmiyyət

Gəncədə “Bolt” sürücüləri sifariş qəbulunu niyə dayandırıb?

11 İyun 2026 13:44

Baxış: 921

VTB-də minimal faiz dərəcəsi ilə nağd kredit 9.9%-dən

Gəncədə taksi xidmətində çalışan sürücülər arasında narazılıq artıb. "Bolt" platforması üzərindən fəaliyyət göstərən bir qrup sürücü mövcud iş prinsiplərinə etiraz əlaməti olaraq avtomobillərini şəhərin mərkəzi hissələrindən birində saxlayıb və sifariş qəbulunu dayandırıb.

Milli.Az xəbər verir ki, sürücülərin sözlərinə görə, son aylarda platforma tərəfindən tətbiq olunan tələblər sərtləşib. Onlar bildirirlər ki, iş yükü və məsuliyyət artsa da, əldə etdikləri qazanc əvvəlki səviyyədə qalmır. Bəzi sürücülər hətta gəlirlərinin əhəmiyyətli dərəcədə azaldığını qeyd edirlər.

Etiraz edənlər hesab edirlər ki, əməkdaşlıq şərtlərinə yenidən baxılmalı, sürücülərin maraqları da nəzərə alınmalıdır. Onların fikrincə, mövcud vəziyyət uzunmüddətli fəaliyyət üçün əlverişli deyil.

Məsələyə münasibət bildirən Bolt şirkəti Gəncədə bir qrup sürücünün tariflərlə bağlı narazılığından xəbərdar olduqlarını açıqlayıb.

Şirkət qeyd edib ki, platformada qiymətlər sabit şəkildə müəyyən edilmir və müxtəlif göstəricilər əsasında formalaşdırılır. Bu göstəricilər arasında sifarişlərin sayı, sürücülərin aktivliyi, bazardakı vəziyyət və xidmətə olan tələbat da yer alır.

Şirkət nümayəndələri əlavə ediblər ki, sürücülərin rəy və təklifləri diqqətdə saxlanılır və onlarla qarşılıqlı əlaqənin davam etdirilməsi prioritet məsələlərdən biridir.

Aysel