TƏBİB-də islahatlar BAŞLADI - Onlar vəzifəsini İTİRDİ - SİYAHI - YENİLƏNİB

"Yeni Klinika"nın direktor müavini və Reproduktiv sağlamlıq və ailə planlaması mərkəzinin rəhbəri vəzifəsini icra edən Gülnar Nuriyeva vəzifəsindən azad olunub.

Milli.Az xəbər verir ki, bu barədə o, sosial şəbəkə hesabında paylaşım edib.

Qeyd edək ki, G.Nuriyeva bu vəzifəyə 2023-cü ildə təyin olunmuşdu.

--------
TƏBİB-in tabeliyində olan bir neçə tibb müəssisəsinin rəhbər şəxsləri işdən azad olunub.

Milli.Az xəbər verir ki, Yeni Klinikanın direktoru Barat Yusubov, Klinik Tibbi Mərkəzin direktoru Könül Ələkbərov və Sabunçu Tibb Mərkəzinin direktoru Nurəngiz Bəşirova tutduqları vəzifələrdən azad ediliblər.

Eyni zamanda, Respublika Təcili və Təxirəsalınmaz Tibbi Yardım Mərkəzinin direktoru Mirələm Cəlalov da vəzifəsindən kənarlaşdırılıb.

Respublika Uroloji Mərkəzin direktoru Pərviz Hacıyev və Abşeron Mərkəzi rayon Xəstəxanasının direktoru Səkinə Sadıxovanın da vəzifələrindən azad edilməsi barədə məlumatlar yayılıb.

Qeyd edək ki, Barat Yusubov 2023-cü ildə Yeni Klinikaya direktor təyin edilib.

Könül Ələkbərov ixtisasca anestezioloq-reanimatoloqdur. O, 2017-ci ildə icbari tibbi sığorta ilə bağlı Mingəçevirdə həyata keçirilən pilot layihənin, daha sonra isə işçi qrupunun rəhbəri olub. 2021-ci ildən etibarən isə Klinik Tibbi Mərkəzin direktoru vəzifəsində çalışırdı.

Nurəngiz Bəşirova 2023-cü ildən Sabunçu Tibb Mərkəzinin direktorudur. Onun yerinə müavini Kamil Hacıyevin təyin olunduğu bildirilir.

Mirələm Cəlalov Respublika Təcili və Təxirəsalınmaz Tibbi Yardım Mərkəzinin direktoru vəzifəsinə 2023-cü ilin yayında, Bakı Şəhər Təcili və Təxirəsalınmaz Tibbi Yardım Stansiyası ilə Respublika Təcili və Təxirəsalınmaz Tibbi Yardım Mərkəzinin birləşdirilməsi prosesindən sonra gətirilmişdi.Mirələm Cəlalovun gedişindən sonra mərkəzə rəhbərliyin müvəqqəti olaraq kimə həvalə ediləcəyi və ya yeni təyinatın kim olacağı barədə hələlik rəsmi məlumat verilməyib.

Xatırladaq ki, aprelin 14-də "Tibbi Ərazi Bölmələrini İdarəetmə Birliyi" (TƏBİB) publik hüquqi şəxsin Müşahidə Şurasının sədri, Azərbaycan Prezidentinin sosial-iqtisadi məsələlər üzrə köməkçisi Xalid Əhədovun sədrliyi ilə keçirilən iclasda qurumun yeni icraçı direktoru vəzifəsinə Anar Bayramov təyin olunub.

Təyinatdan sonra TƏBİB-in strukturunda da dəyişikliklər olub. Bir müddət öncə müşavir təyin olunan Zeynal Bayramlı vəzifəsindən azad edilib.

Daha sonra yeni icraçı direktor Anar Bayramovun əmri ilə onun müşavirləri Elnur Qurbanov, Emil Qasımov, Pərvin Əkbərov və Vüqar Yaqublu da vəzifələrindən kənarlaşdırılıblar.

Bundan əlavə, TƏBİB-in Strateji İnkişaf Departamentinin rəhbəri Murad Mirzəyev də işdən azad olunanlar sırasındadır.

Hazırda sözügedən vəzifələrə yeni təyinatlar açıqlanmayıb. Kadr dəyişikliklərinin davam edib-etməyəcəyi isə maraqla gözlənilir.

Mina Mikayılova
Milli.Az