Marketlərdə satılan yeməklər təhlükəlidir?

Son zamanlar bir çox marketlərdə hazır yeməklərin satışa çıxarılması alıcılar üçün rahatlıq yaradır. Lakin bu rahatlığın arxasında ciddi məsuliyyət dayanır.

İsti və ya soyuq formada təqdim olunan yeməklərin düzgün saxlanılmaması və ya gigiyenik qaydalara əməl edilməməsi qida zəhərlənməsinə səbəb ola bilər.

Bəs vətəndaşların diqqət etməli olduğu məqamlar nələrdir?

Qida eksperti Ağa Salamov Milli.Az-a açıqlamasında bildirib ki, mağazalarda təqdim olunan isti yeməklərin saxlanma və təqdimat qaydaları xüsusi diqqət tələb edir.

Onun sözlərinə görə, əgər yeməklər qapalı şüşə vitrinlərdə saxlanılırsa, onların buxar və istilik şəraitində təqdim olunması vacibdir. Qeyd edib ki, isti yeməklər daim isti vəziyyətdə saxlanmalı və müştəriyə elə formada təqdim edilməlidir ki, temperaturu uyğun olsun.

"Bu cür yeməklər maksimum 3 saat ərzində satışda qala bilər. 3 saatdan sonra həmin məhsullar yeniləri ilə əvəz olunmalı və artıq istifadə üçün yararsız hesab edilməlidir. Çünki bu müddətdən sonra qida zəhərlənməsi riski yüksəlir".

Ekspert nəzərə çatdırıb ki, bufet və iaşə məntəqələrində çalışan işçilər də sanitar-gigiyenik qaydalara ciddi əməl etməlidirlər. Əlavə edib ki, aşpazlar təmiz, vahid iş geyimində olmalı, baş örtüyü taxmalı və yeməklərlə işləyərkən gigiyena qaydalarını qorumalıdırlar:

"İsti yeməklər tez-tez qarışdırılmalıdır ki, səthində quruma və ya bakterial çirklənmə yaranmasın".

A.Salamov ət, balıq, toyuq kimi məhsullardan hazırlanan yeməklərin də eyni qaydalarla yəni, maksimum 2-3 saat ərzində satılmalı və yenilənməli olduğunu vurğulayıb.

Mayonezli salatlar, paytaxt salatı, yumurta və toyuqdan hazırlanan məzələr və s. kimi soyuq qəlyanaltılardan danışan ekspert söyləyib ki, onlar yalnız soyuducu şəraitdə təqdim olunmalıdır. Bildirib ki, bu məhsullar da maksimum 2-3 saat ərzində satışda qala bilər. Əgər soyuducu vitrində, uyğun temperaturda saxlanılırsa (məsələn, +4°C ətrafında), o zaman 48 saata qədər satışa icazə verilə bilər:

"Yekun olaraq, həm isti, həm də soyuq yeməklərin saxlanması və təqdimatı sanitar norma və standartlara uyğun şəkildə aparılmalıdır ki, zəhərlənmə halları baş verməsin".

Mina Mikayılova
Milli.Az