Cəmiyyət

Ev "plana düşəndə" kompensasiya necə hesablanmalıdır? - AÇIQLAMA

3 Aprel 2025 14:01

Baxış: 5 379

VTB-də minimal faiz dərəcəsi ilə nağd kredit 9.9%-dən

#MƏNZİL #SÖKÜNTÜ

"Paytaxtdakı mənzillər və obyektlərin qiyməti artırsa, söküntü zamanı kompensasiya da buna uyğun olmalıdır".

Bunu Milli.Az-a iqtisadçı ekspert, Azərbaycan Qiymətləndiricilər Cəmiyyətinin (AQC) sədri Vüqar Oruc deyib.

"Sahibkarla ev sahibləri arasında yaranan mübahisə əksər hallarda əmlakın qiyməti ilə bağlı olur. Vətəndaş, şirkət, sahibkar dövlət qurumu söküntü qarşılığında müəyyən olunmuş kompensasiyanı özbaşına müəyyən etməklə bağlı hüquq və imtiyazlara malik deyil. Tələb və təklif olunan məbləğ yalnız həmin ərazidə qiymətləndirmə palatasının qiymətləndirilməsi aparılmasından sonra müəyyən edilə bilər. Hazırda paytaxtda əraziyə görə vətəndaşa ödənilən kompensasiya 1500-3500 manat arası dəyişir.

Adətən mülkiyyət sahibləri daha çox məbləğ əldə etmək istəyirlər. Çünki həmin məbləğə yeni tikinmiş binalardan mənzil əldə etsinlər. Obyektivlik olsun deyə mütləq ortada müstəqil qiymətləndirmə prosesi olmalıdır. Həmin prosesin rəyinə uyğun olaraq, vətəndaşların hüquqları tapdalanmasın, sahibkarlar isə artıq xərclərə məruz qalmasın".

Məsələ ilə bağlı hüquqşünas Ruslan Vəliyev isə bildirir ki, əgər əmlak sahibinin mülkiyyət hüququ pozulubsa, sahibkarlardan kompensasiya tələb oluna bilər.

"Kompensasiya isə təkcə əmlakın bazar qiyməti ilə məhdudlaşmır. Əgər müqavilə üzrə müəyyən vəzifə və öhtəliklər götürülübsə və buna əməl edilmirsə, təbii ki burda mülki məsuliyyət yaranır. Vətəndaşın da hüququ var ki, ona dəymiş zərər üzrə iddia qaldırsın. Məhkəmə qaydasında isə nəinki ona dəymiş zərərlə bağlı, vəkil və məhkəmə xərclərini də tələb edə bilər".

Aysel Əkbər
Milli.Az