Azərbaycanda da avtomobillər üçün "VİN Kod" olacaq - AÇIQLAMA

Son illərdə Azərbaycanda avtomobillərin və digər nəqliyyat vasitələrinin şəxsiyyətini təsdiqləyən məlumatların toplanması və təkmilləşdirilməsi istiqamətində bir sıra addımlar atılmaqdadır. Bu proseslər avtomobil sahiblərinə öz nəqliyyat vasitələri ilə bağlı bütün məlumatlara asanlıqla daxil olma imkanı təqdim etməklə yanaşı, həm də dövlətin müvafiq qurumlarına avtomobil sahiblərinin məlumatlarını daha səmərəli şəkildə idarə etməyə şərait yaradır.

Hazırda Azərbaycanda avtomobilin başına gələn hadisələrlə bağlı məlumatların toplanması və saxlanması üçün xüsusi bir sistemin formalaşdırılması məqsədilə dövlət və özəl sektorda müxtəlif təşəbbüslər həyata keçirilir. Bu sistem vasitəsilə avtomobilin qeydiyyatından tutmuş, sığorta və təmir xidmətlərinə qədər olan məlumatlar bir mərkəzdə toplanacaq.

Bəs bu cür proseslər necə təkminləşdiriləcək? 

Mövzu ilə bağlı Azərbaycan Sığortaçılar Assosiasiyasından Milli.Az-ın sorğusuna cavab olaraq bildirildi ki, data-bazanın formalaşdırılması və təkmilləşdirilməsi baxımından bu məqam çox önəmli və əhəmiyyətlidir. Düzdür, hazırda belə bir tətbiq yoxdur. Lakin təfərrüatlı informasiyanın toplanacağı data mərkəzinin formalaşdırılması istiqamətində yerli sığorta sektoru artıq əsaslı addımlar atmağa başlayıb. Belə ki, yerli sığorta bazarımız hazırda dünya təcrübəsi, xüsusilə də Türkiyə praktikası yaxından öyrənir və yerli bazarda tətbiqi imkanlarını təhlil edir. Çünki hər bir ölkənin öz bazar şərtləri var.

"Bilirsiniz ki, data mərkəzinin formalaşdırılmasında informasiyaların elektron inteqrasiyası prosesi başlıca məqamlardandır. İnformasiyaların elektron inteqrasiyası prosesi də bir qurumu və ya bir şirkəti əhatə etmir. Burada bir neçə əlaqəli qurumun və şirkətlərin informasiya bazalarının inteqrasiyasından söhbət gedir. Bu da öz növbəsində zaman tələb edən prosesdir.

Hesab edirik ki, növbəti mərhələdə data mərkəzin formalaşdırılması həm informasiyaların sistemli şəkildə vahid mərkəzdə toplanmasını təmin edəcək, həm də gələcəkdə qarşıya çıxa biləcək sığorta dələduzluğu halları ilə mübarizəni gücləndirəcək".

Aysel Əkbər
Milli.Az