Şou-biznes

Deputat Elzanı müdafiə etdi: Rasim Balayev elə deməməli idi...

30 Noyabr 2018 16:44
13 Şərh     Baxış: 4 899
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Xalq artisti Rasim Balayevin Əməkdar artist Elza Seyidcahanı sərt tənqid etməsi barədə məlumat vermişdik. Xalq artisti CVN TV-də çıxışı zamanı zövqlərin korlandığını, televiziyalardakı özbaşınalığın artdığını qeyd edib.

"Elza Seyidcahan şeirlər oxuyur. Ona deyən yoxdur ki, get, işinlə məşğul ol. Sən şair deyilsən", - deyə Rasim Balayev vurğulayıb.

Milli.Az yeniavaz.com-a istinadla xəbər verir ki, deputat, akademik, filologiya elmləri doktoru Nizami Cəfərov məsələyə münasibət bildirib.

N. Cəfərov Rasim Balayevdən fərqli olaraq Elza Seyidcahanın şeirləri haqqında müsbət fikirdə olduğunu bildirib: "Bu, heç söhbət deyil. Elza Seyidcahana heç kim "sən şair deyilsən" deyə bilməz. Niyə? Ona görə ki, ümumiyyətlə heç kimə, yazı yazana, şeir yazana "sən şair deyilsən" demək olmaz. Ona qalsa, dünyada da, Azərbaycanda da çox məşhurlaşan şairlər olub ki, şair deyillər. Ya kimin üçünsə şair deyillər, ya ümümi böyük sənət dəyərləri baxımından şair deyillər. Ona görə də bu, absurd söhbətdir".

Millət vəkili Nizami Cəfərov əməkdar artist Elza Seyidcahanın zəngin düşüncəli bir xanım olduğunu deyib: "Elza Seyidcahan çox hissiyatlı, çox zəngin düşüncəli bir xanımdır. Musiqisi ilə yanaşı, yaxşı oxumağı ilə yanaşı, həm də çox məzmunlu bir xanımdır. İndi kim Elza Seyidcahandan hansısa şairlik standartları tələb edir və ya onun özü şairlik iddiasındadırmı, gəlib Azərbaycan şairlərinə başçılıqmı etmək istəyirmi biz ona deyək ki, sən şair deyilsən? Ona görə də ümumiyyətlə heç kimə elə demək olmaz. Axı Rasim Balayev müdrik adamdır, istedadlı adamdır, şeir, ədəbiyyat nədir onu bilən adamdır. Belə adamlar gərək elə söz deyəndə bir az həssas olsunlar. Mən heç vaxt istəməzdim ki, Elza Seyidcahana elə bir söz deyilsin".

"Elza Seyidcahanın yazdığı şeirlərlə tanışsınızmı, məlumatınız varmı?" sualımıza millət vəkilinin cavabı belə oldu: "Bəli, onun yazdığı şeirlərdən xəbərim var. Elza Seyidcahanın şeirlərinə qulaq asmışam, yaxşı şeirləri də var, şeirlərində yaxşı ifadələr də var, yaxşı hissiyyatlar da var. Amma təbiidir ki, böyük şair deyil. Elza xanım birbaşa incəsənətlə məşğuldur də, şeiriyyat Elza Seyidcahanın ruhunda, canında olmasa, elə gözəl oxuya bilməz. Hamıda şairlik var, Elza Seyidcahan müəyyən şeirlər yazır, çox böyük iddialarla yazmır. Vallah, Yazıçılar Birliyinin Elza Seyidcahandan qat-qat aşağı səviyyəli şeirlər yazan üzvləri var. Yazıçılar Birliyinə üzvdürlər, amma Elza Seyidcahanın şeirləri onların şeirlərindən yaxşıdır.

Ona görə də düşünürəm ki, elə söz demək olmaz. İkincisi, zövqlü, söz zövqü olan, incəsənət, ədəbiyyat ruhu olan bir insandır Elza Seyidcahan. Sənətdə, ədəbiyyatda, ümumiyyətlə, incəsənətdə qətiyyən təsadüfi adam deyil".

Nizami Cəfərov bildirib ki, Elza Seyidcahanın Yazıçılar Birliyinin üzvü olmaq istəməsində də qətiyyən qeyri-adi bir şey yoxdur: "Elza Seyidcahan Azərbaycan Yazıçılar Birliyinin üzvü ola bilər".

Milli.Az 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.