2024-cü ildə itirdiyimiz məşhurlar - FOTO

2024-cü ildə ölkəmizin tarixində iz qoyan bir çox önəmli hadisələrlə yanaşı, itirdiyimiz sənət adamları da xeyli saydadır.

Kimisi uzun sürən xəstəlikdən, kimisi gözlənilmədən gözlərini əbədi olaraq bu dünyaya yumdu. 

2024-cü ildə dünyasını dəyişmiş məşhurların siyahısını oxuculara təqdim edirik:

2024-cü ilin əvvəlində itirdiyimiz ilk sənətkar Əməkdar artist Aygün Bəylər oldu. O, uzun sürən xəstəlikdən sonra Türkiyədə malicə aldığı xəstəxanada vəfat edib. Nəşi vətənə gətirilən sənətkar Suraxanı qəbristanlığında dəfn olunub.

Daha bir ağır xəstəlikdən itirdiyimiz sənətçi Əməkdar artist Gülbahar Şükürlüdür. O, 2024-cü ilin yanvarında 62 yaşında vəfat edib. Qarmon ifaçısı uzun müddət xərçəngdən əziyyət çəkib.

"Sehrli xalat" filmində baş rolun - Rəşid obrazının ifaçısı Azər Qurbanov da yanvarda itirdiyimiz tanınmışlardandır. Ömrünün son 30 ilini ABŞ-da yaşayan Azər Qurbanov ağır xəstəlikdən nəticəsində dünyasını dəyişib.

Tanınmış müğənni, Əməkdar artist Sahibə Əhmədova mart ayında vəfat edib. İfaçı xərçəng xəstəliyindən dünyasını dəyişib. Müğənni "Şah İsmayıl" operasında Ərəbzəngi rolunun əvəzsiz ifaçısı kimi şöhrət qazanıb. O bir zamanlar oxuduğu muğam və xalq mahnıları ilə məşhurlaşmışdı.

Hər kəsi qəhərə boğan daha bir acı xəbər də Əməkdar artist Cavanşir Məmmədovdan gəldi. O, bu ilin aprelində gözlənilmədən dünyasını dəyişdi. Verilən açıqlamada müğənninin ölümünə səbəb kimi ürəktutması göstərilib.

Meyxana dünyası da bu il gənc ifaçılarının vaxtsız gedişi ilə sarsıldı.

Mahnıları dillər əzbəri olan tanınmış meyxanaçı Elnur Valeh bu ilin iyulunda vəfat edib. Meyxanaçı uzun müddət şəkərli diabet, xroniki böyrək çatışmazlığından əziyyət çəkirdi.

Bir çox sevilən rollara həyat verən aktrisa Naibə Əlibəyova da bu ilin martında itirdiyimiz məşhurlardandır. O, uzun müddət onkoloji xəstəlikdən əziyyət çəkib və müalicə almasına baxmayaraq dünysını dəyişib.

Uzun müddətdir ürəkçatışmazlığından əziyyət çəkən meyxanaçı Xəyyam Əhmədli də dekabr ayında itirdiyimiz məşhurlardandır. Bütün sənət dünyasının kömək əlini uzatdığı meyxanaçı, bütün səylərə baxmayaraq həyata tutuna bilmədi və 44 yaşında dünyasını dəyişdi. /azxeber.com

Milli.Az