Siyasət

"Azərbaycan pandemiyaya qarşı mübarizədə ilk günlərdən Ümumdünya Səhiyyə Təşkilatı ilə səmərəli əməkdaşlıq edir"

12 Aprel 2020 19:02
Baxış: 2 024

Bu gün bütün ölkələrin gündəliyində duran ən vacib məsələ məhz vətəndaşların koronavirus infeksiyasına yoluxmasının qarşısını almaqdan ibarətdir. Azərbaycan da bu istiqamətdə bütün zəruri addımları atır. Azərbaycan pandemiyaya qarşı mübarizədə ilk günlərdən Ümumdünya Səhiyyə Təşkilatı (ÜST) ilə səmərəli əməkdaşlıq edir.

Milli.Az bildirir ki, bunu Trend-ə Milli Məclisin deputatı Cavanşir Feyziyev deyib.

C.Feyziyev bildirib ki, yayılmaqda davam edən virusun ÜST tərəfindən pandemiya elan olunmasından etibarən, Azərbaycan hökuməti virusla mübarizəni ÜST-ün tövsiyələri istiqamətində aparır:

"ÜST-ün Azərbaycanın koronavirusla mübarizədə atdığı addımları nümunəvi adlandırması onu deməyə əsas verir ki, hökumətimiz qlobal miqyasda aparılan bu mübarizənin önündə gedir".

Deputat qeyd edib ki, Azərbaycanda bu günə qədər koronavirusu müəyyən etmək üçün 60 mindən artıq testin keçirilməsi, hökumətin müvafiq qurumların prioritetlərini vaxtında və düzgün müəyyən etdiyini və vaxtında ölkəyə kifayət qədər test materialları alıb gətirdiyini göstərir:

"Epidemiya yayılmağa başladığı gündən etibarən, intensiv olaraq testlərin tətbiqi, yoluxmuş insanların vaxtında aşkar olunmasını və lazımi təcrid tədbirlərinin görülməsini mümkün edib. Buna görə də ölkəmizdə bu virusun yayılma səviyyəsi bir sıra Avropa ölkələrində olduğu kimi nəzarətdən çıxmayıb. Aşkar olunmuş xəstələr bu xəstəlik üçün ayrılmış tibb müəssisələrində müalicəyə cəlb olunub. Hazırda ölkənin paytaxtında və müxtəlif bölgələrində 20-dən çox xəstəxana koronavirus xəstələrinin təcrid olunması və müalicəsi üçün tam hazır vəziyyətə gətirilib. Eyni zamanda, daha 10 modul tipli xəstəxananın quraşdırılması haqqında qərar qəbul olunub. Bu kimi önləyici tədbirlərin görülməsi virusun yayılma miqyasının tez bir zamanda lokallaşdırılmasına və məhdudlaşdırılmasına imkan verəcək".

C.Feyziyev vurğulayıb ki, Nazirlər Kabineti yanında fəaliyyət göstərən Operativ Qərargahın müəyyən etdiyi karantin vəziyyəti mövcud reallıqdan doğur və dünya təcrübəsi də göstərir ki, epidemiyalar və qlobal pandemiyalar zamanı karantin tədbirləri xəstəliyə yoluxma hallarının qarşısının alınmasında ən səmərəli tədbirdir:

"Karantin tədbirləri vasitəsilə virusun yayılma arealı daraldılır. Yalnız karantin tədbirləri bütün dünya miqyasında aparılan digər müayinə və müalicə tədbirlərinin səmərəli olmasını şərtləndirir və mümkün edir. Bütün vətəndaşlar epidemiyanın tezliklə aradan qaldırılmasını istəyirlər. Buna görə də insanlar elan olunmuş karantin qaydalarına ciddi riayət etməlidir. Mövcud vəziyyətdə dövlət və cəmiyyətin qarşılıqlı razılaşma və dəstək şəraitində ahəngdar addımlar atması, problemin həllinin sürətlənməsinə kömək edəcək. Əks təqdirdə, virusun yayılması nəzarətdən çıxa və çoxsaylı insan tələfatına səbəb ola bilər. Hər bir vətəndaş məsuliyyətini dərk etməli və üzərinə düşən vəzifələri yerinə yetirməklə bu mübarizəyə öz töhfəsini verməlidir".

Milli.Az

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.