Siyasət

Avropa İttifaqı: Azərbaycandakı əməkdaşlıq layihələrinin təxminən 30 faizi təhsillə bağlıdır

2 Oktyabr 2019 12:11
0 Şərh     Baxış: 716

Azərbaycanın müxtəlif qurumları ilə həyata keçirilən əməkdaşlıq layihələrinin təxminən 30 faizi məhz təhsillə bağlıdır.

Milli.Az Trend-ə istinadən xəbər verir ki, bunu Avropa İttifaqının maliyyələşdirdiyi və YUNİSEF-in dəstəyi ilə Təhsil İnstitutu tərəfindən icra olunan "İcma qrupları vasitəsilə məktəbəqədər və ibtidai təhsilin yaxşılaşdırılması" layihəsinin təqdimat mərasimində çıxış edən Avropa İttifaqının Azərbaycandakı Nümayəndəliyinin rəhbəri Kestutis Yankauskas deyib.

Onun sözlərinə görə, bu layihə Avropa İttifaqının Təhsil Nazirliyi ilə birlikdə həyata keçirdiyi 6 layihədən biridir: "Hesab edirik ki, təhsil ən fundamental və vacib məsələdir. Bizim öhdəliyimiz odur ki, uşaqlara ən yaxşı təhsili verə bilək. Biz ən həssas qrupları müəyyən edirik. İcmalar və valideynlərlə danışıb onları bu işə cəlb edirik ki, layihələrimizi dəstəkləsinlər. Bir ildən sonra biz əminliklə deyə bilərik ki, təxminən 8 minə yaxın uşağın məktəbəqədər təhsilə çıxış imkanı olacaq. Onlar digər uşaqlar kimi sosiallaşacaqlar. Onlar məktəbdə daha yaxşı təhsil almağa hazırlaşırlar".

K.Yankauskas əlavə edib ki, Avropa İttifaqı uşaqların məktəbəqədər təhsildən yararlana bilməsi üçün imkanlar yaradır və bunun üçün Avropa ölkələrinin ən yaxşı modellərini axtarır: "Avropa İttifaqı və Azərbaycanın uğurlu əməkdaşlığını görə bilirik və problemləri birgə müəyyənləşdiririk. Avropa İttifaqı və Azərbaycan əməkdaşlığı ən yaxşı əməkdaşlıq nümunəsidir".

Milli.Az

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.