Siyasət

İngiltərədə Brexit-lə bağlı həlledici səsvermə: Bu gün niyə önəmlidir?

12 Mart 2019 21:08
0 Şərh     Baxış: 260

Mövcud şərtlər altında Britaniya Avropa İttifaqından üç həftədən sonra ayrılmalıdır.

Çərşənbə axşamı Britaniya parlamentində yenilənmiş Brexit müqaviləsi səsverməyə çıxarılmalıdır.

Bugünkü səsvermənin nəticələri Britaniyanın Aİ-dən ayrılması prosesində dönüş nöqtəsi ola bilər.

Səsvermə nə vaxtdır?

Gün ərzindəBaş Nazir Theresa May-in Brexit müqaviləsi Britaniya parlamentinin aşağı palatasında müzakirə olunacaq.

Səsvermə Bakı saat ilə gecə 12:00-da başlamalıdır.

Avam Kamarası

Parlament üzvləri nəyə səs verəcəklər?

Baş nazir Theresa May və onun komandası iki ildir ki Brüssellə Brexit-in şərtlərini müzakirə edirlər.

Parlament üzvləri bu səsvermədə müqaviləni ya dəstəkləməlidir, ya da rədd etməlidirlər.

Bugünkü səsvermə niyə həlledicidir?

Parlament müqaviləni rədd etsə iki mümkün variant ola bilər:

  • Britaniya Aİ-nı martın 29-da müqaviləsiz tərk edir.
  • Brexit təxirə salınır, yəni Aİ-dən ayrılma tarixi uzadılır.

Theresa May-in təklif etdiyi müqavilə parlament tərəfindən qəbul olunsa Britaniyanın Aİ-dən ayrılma prosesi martın 29-da başlayacaq. Ayrılma prosesinin keçid dövrü isə 2020-ci ilin dekabrınadək davam edəcək.

Keçid dövrü müddətində London və Brüssel Britaniya ilə Aİ arasında gələcək münasibətlərin və əməkdaşlığın əsaslarını işləyib hazırlamalıdır.

Müzakirə ediləcək məsələlər, o cümlədən ticarət müqaviləsini və İrlandiya Respublikası ilə Şimali İrlandiya arasında sərhədin tənzimlənməsini də əhatə edir.

May ve Juncker

İlk anlaşma mətni nəyə görə rədd edildi?

Baş nazir Theresa May-in Brexit müqaviləsinin ilkin variantı yanvarın 15-də parlamentin səsverməsinə çıxarılıb, lakin həmin variant 432 səs əleyhinə, 202 səs lehinə nəticəsilə rəd edilib.

Beləliklə, Baş nazir Theresa May-in höküməti Britaniyanın siyasi tarixində özünəməxsus bir rekord qırıb: Britaniya parlamenti tarixində heç bir hökümət bu dərəcədə böyük səs fərqilə hələ məğlub olmamışdı.

Həmin məğlubiyyətin əsas səbəbi "backstop" adı almış Şimali İrlandiya ilə İrlandiya Respublikası arasında sərhəd rejiminin Brexit müqaviləsinin mətnində qeyri-müəyyən halda qalması olub.

Ötən axşam Strasbourg-a yollanan Thersa May bildirib ki, bu dəfə "backstop"-la bağlı Aİ-dən hüquqi təminatlar alıb.

Belə ki, "backstop" problem ilə bağlı verilmiş təminatlar Aİ tərəfindən pozulacağı təqdirdə, Britaniya Brüssələ qarşı hüquqi müstəvidə iddia irəli sürə bilər.

İkinci təminat müştərək siyasi bəyanatın mətnilə bağlıdır. Həmin mətndə tərəflər 2020-ilin dekabrınadək Şimali İrlandiya ilə İrlandiya Respublikası arasında sərhəd rejimi problemini çözmək əzmində olduqlarını bildiriblər.

Anlaşma yenidən rədd edilsə nə olacaq?

Baş nazir bundan əvvəl söz verib ki, onun Brexit müqaviləsi variantı parlament tərəfindən rədd olunarsa, o zaman Aİ-dən müqaviləsiz ayrılma məsələsi səsverməyə qoyulacaq.

Brexit müqaviləsi parlamentdə bu gün rədd edilsə, bu məsələyə dair səsvermə çərşənbə axşamı keçiriləcək.

Müqavilə parlament tərəfindən qəbul olunsa, Britaniya martın 29-da Aİ-ni müqaviləsiz tərk edə bilər.

Lakin parlament müqaviləsiz Brexit-i rədd etsə, onda Britaniya Aİ-dən Brexit üçün əlavə vaxt, yəni vaxtın uzadılmasını xahiş edə bilər.

Həmin məsələyə dair səsvermə Britaniya parlamentində cümə axamı keçirilə bilər.

Aİ-dən ayrılmaq üçün bugünkü səsvermə son şansdırmı?

Bugünkü səsvermə Theresa May-in son şansı olmaya bilər. Anlaşma mətni cüzi fərqlə parlament tərəfindən rədd edilərsə, May Aİ-dən qısa müddətli möhlət istəyə bilər.

Bir və ya iki ay çəkəcək bu vaxt möhləti ərzində hökümət müqavilənin əleyhinə səs vermiş parlament üzvlərilə iş aparıb onları anlaşmanın lehinə səs verməyə inandırmağa çalışa bilər.

Martın 21-22-də keçiriləcək Aİ sammitindən sonra Theresa May yenidən Brexit müqaviləsinin mətnini parlamentdə səsverməyə çıxara bilər.

Jeremy Corbyn

İkinci referendum ola bilərmi?

Əsas müxalifət partiyası olan Leyboristlərin lideri Jeremy Corbin aylarla sürən qeyri-müəyyənlikdən sonra bu yaxınlarda eyham vurub ki, onun partiyası ikinci referendumu dəstəkləyə bilər.

Ancaq Corbyn onu da qeyd edib ki, Leyborist partiyasının başlaca məqsədi ölkədə erkən seçkilərin keçirilməsinə nail olmaqdır.

Milli.Az

Şərh yaz:

0 Şərh:

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.