Milli Məclisə ayrılan xərclər açıqlandı

2019-cu ilin dövlət büdcəsindən Milli Məclisin və onun aparatının saxlanması üçün xərclər smetası 27 milyon 69 min 600 manat məbləğində müəyyənləşib.

Milli.Az Trend-ə istinadən bildirir ki, bunu Milli Məclisin işlər idarəsinin müdiri Firudin Hacıyev "Milli Məclisin 2019-cu il üçün xərclər smetası haqqında" qanun layihəsini təqdim edərkən deyib.

O qeyd edib ki, xərclər smetası 2018-ci il ilə müqayisədə 2 milyon 837 min 545 manat artırılıb.

F.Hacıyev vurğulayıb ki, xərclər smetasının 68.5 faizini əməkhaqqı fondu və əməkhaqqı ilə bağlı xərclər təşkil edir: "Son illər ölkədə aparılan məqsədyönlü siyasətin davamı olaraq Azərbaycan parlamentinə xarici ölkələrdən gələn qonaqların, eləcə də deputatların həm xarici, həm də daxili ezamiyyətlərinin sayı xeyli artıb".

Onun sözlərinə görə, normativ hüquqi aktlar haqqında Konstitusiya qanununun layihəsinə III oxunuşdan baxılması nəzərdə tutulduğundan, Milli Məclisin iclaslarının sayının çoxalması ilə əlaqədar dəftərxana, mətbəə avadanlıqlarının alınması xərclərinin artırılmasına, Milli Məclisin inzibati binasında 1994-cü ildən xidməti istifadə üçün quraşdırılan operativ rabitə ATS-nin yenidən qurulmasına, Milli Məclisin inzibati binalarının isidilməsi və soyudulmasını həyata keçirmək üçün 2006-cı ildə quraşdırılan kinderlərin sıradan çıxmış bəzilərinin yenisi ilə əvəz edilməsi, informasiya texnologiyalarının inkişafı ilə əlaqədar Milli Məclisin inzibati binasında 2 ədəd məlumat bazası, servis otağının yenidən qurulmasına vəsait tələb olunur:

"Göstərilənləri nəzərə alaraq, 2019-cu ilin xərclər smetasında bəzi maddələrdə vəsait çatışmazlıqlarını nəzərə alaraq dəftərxana və təsərrüfat xərcləri paraqrafına 50 min, mətbəə xərclərinə 50, ezamiyyəyə 200 min manat, avadanlıqların alınması maddəsinə 150 min manat, digər alış və xidmətlər maddəsinə 200 min, icarə və muzdlu xidmətlər paraqrafına 200 min, digər maşın və avadanlıqlara 250 min manat, eləcə də Milli Məclisin avtoparkında maddi texnikanın bazasınaın yaxşılaşdırılması məqsədilə 200 min manat vəsaitin ayrılmasına köməklik göstərilməyini xahiş edirik".

Milli.Az