Siyasət

"Bu böyük tərbiyəsizlikdir" - Qənirə Paşayeva

18 Noyabr 2017 13:45
38 Şərh     Baxış: 5 866

"Bu böyük bir tərbiyəsizlikdir. Bir dövlətin, xalqın duyğularını ciddi şəkildə zədələmək deməkdir. Çünki NATO-da Atatürkün kim olduğunu bilməyən yoxdur".

Milli.Az xəbər verir ki, bunu qafqazinfo-ya açıqlamasında millət vəkili Qənirə Paşayeva NATO-nun  Norveçdə Ortaq Hərb Mərkəzində keçirilən təlimi zamanı norveçli zabitin "düşmən liderlərinin hədəf tablosu"na  Mustafa Kamal Atatürkün və Rəcəb Tayyib Ərdoğonın şəkillərinin qoyulmasına münasibət bildirərkən deyib.  

Millət vəkili vurğulayıb ki, Türkiyə NATO-nun üzvüdür: "Türk millətinin Atatürkə necə həssas yanaşdığını bilirlər. İkinci şəxs isə Türkiyə xalqının seçdiyi prezidentdir. NATO çox təəssüf ki, belə bir tərbiyəsizliyə imkan yaradıb. Onlara qarşı bu hörmətsizliyə sadəcə Türkiyə reaksiya verməməlidir. Bütün NATO ölkələri  ciddi şəkildə buna etiraz etməli idi. Sadəcə üzr istəmək də yetərli deyil, bütün məsul şəxslər bu tərbiyəsizliyə görə cavab verməlidir.

Niyə Fransa, yaxud Almaniya dövlətinin başçılarının şəkli asılmayıb? Həm də söhbət indiki prezidentlərdən gedirsə, niyə Atatürkün rəsmi asılıb?  

Bu təlim prosesi gizli keçirilməyib. Bundan əvvəlcədən səlahiyyətli şəxslərin hamısının xəbəri olub. Onların hamısının ciddi şəkildə cəzalandırılması lazımdır. Söhbət bir xalqın özünə milli lider seçdiyi şəxsdən və prezidentdən gedir. Atatürk bütün dünyada tanınan, sayqı ilə anılan şəxsiyyətlərdən biridir.  Bunun Türkiyədə nə kimi reaksiya doğuracağından NATO-da çalışan ən sıravi şəxsin belə xəbəri var. Bu bir təxribatdır. Biz də bu məsələdə qadaş Türkiyənin yanındayıq".

Milli.Az

Digər maraqlı xəbərlər Milli.Az-ın Facebook səhifəsində

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.