Siyasət

Bundestaq üzvü: "Azərbaycanın ərazi bütövlüyü bərpa olunmalıdır"

13 İyul 2017 14:36
0 Şərh     Baxış: 618

"Azərbaycanın ərazi bütövlüyü bərpa olunmalı, məcburi köçkünlər öz vətənlərinə qayıtmalıdırlar".

Milli.Az Trend-ə istinadən xəbər verir ki, bunu erməni vəhşiliyi nəticəsində Füzuli rayonunun Alxanlı kəndində Sahibə Quliyeva və onun iki yaşlı nəvəsi Zəhra Quliyevanın qətlə yetirilməsi ilə əlaqədar Avropa Azərbaycan Cəmiyyətinin (TEAS) Berlin ofisi tərəfindən verilən sorğuya cavab olaraq, Almaniya Bundestaqındakı CDU/CSU parlament qrupunun üzvü Stefan Mayer bəyanatında deyib.

S.Mayer qeyd edib ki, Ermənistan-Azərbaycan, Dağlıq Qarabağ münaqişəsi iki ölkənin silahlı qüvvələri arasında qanlı döyüşlərə səbəb olub: "Bu münaqişə hər iki tərəf üçün köçkün axınının yaranması və minlərlə günahsız insanın ölümü ilə yadda qalıb. Bu qanlı savaşda iyirmi beş minə yaxın insan həlak olub, bir milyona yaxın Azərbaycanın dinc sakini isə didərgin düşüb".

Almaniyalı deputat vurğulayıb ki, Ermənistan nəinki Dağlıq Qarabağı, həmçinin Azərbaycanın digər ərazilərini də - Dağlıq Qarabağ ətrafındakı yeddi rayonu da işğal edib: "1993-cü ildə Azərbaycan ərazisinin bir hissəsinin hərbi işğalı Birləşmiş Millətlər Təşkilatının Təhlükəsizlik Şurası tərəfindən pislənilib. Almaniya Federativ Respublikası tərəfindən dəstəklənən bu tələb indiyədək qüvvədədir".

S.Mayer vurğulayıb ki, dünya ictimaiyyəti Dağlıq Qarabağı Azərbaycanın ayrılmaz hissəsi kimi tanıyır: "Avropa İttifaqı və Almaniya bu münaqişənin yalnız sülh yolu ilə həll ola biləcəyindən əmindir. O, 2010-cu ildə Dağlıq Qarabağda keçirilmiş parlament seçkilərini Avropa İttifaqı və Almaniya tərəfindən tanınmadığını qeyd edib. Avropa Təhlükəsizlik və Əməkdaşlıq Təşkilatı çərçivəsində fəaliyyət göstərən Minsk qrupu 1992-ci ildən bu günədək regionda sülh yaratmağa çalışır. Dağlıq Qarabağın işğalı beynəlxalq hüquq üzrə öhdəlikləri pozur. BMT Xartiyasının II maddəsi, 3 və 4 saylı bəndinə əsasən, bütün ölkələr öz beynəlxalq mübahisələrini elə həll etməlidir ki, beynəlxalq hüquq, təhlükəsizlik və ədalət təhlükə altına düşməsin. BMT-nin hər bir üzvü digər ölkənin ərazi bütövlüyünü təhlükə altına ala biləcək və təşkilatın məramına zidd hərəkətlərdən çəkinməlidir. Azərbaycanın ərazi bütövlüyü bərpa olunmalı, məcburi köçkünlər öz vətənlərinə qayıtmalıdırlar".

S.Mayerin sözlərinə görə, 2012-ci ildə Almaniya Bundestaqında Dağlıq Qarabağ münaqişəsinin 20 illiyinə həsr olunmuş toplantıda, CDU/CSU parlament qrupunun xarici əlaqələr üzrə işçi qrupu münaqişənin həll yollarına dair müzakirələr keçirib və təkliflərini verib. Bundestaq deputatının fikrincə, münaqişənin sülh yolu ilə həlli və münasibətlərin normallaşması bütün regionda sosial və iqtisadi impulslar yaradacaq. Bu baxımdan Almaniya Bundestaqında fəaliyyət göstərən CDU/CSU parlament qrupunun xarici əlaqələr üzrə işçi qrupu, BMT, NATO və ATƏT kimi qurumlar münaqişə tərəflərinə bir daha müraciət edərək Dağlıq Qarabağ məsələsinin həlli üçün səyləri artırmağa çağırıblar. Tərəflər arasında aparılan danışıqlarda ilk növbədə təmas xəttinə yaxın ərazidə yaşayan dinc sakinlərin təhlükəsizlik məsələləri müzakirə predmetinə çevrilməli və öz həllini tapmalıdır.

Xatırladaq ki, iyulun 4-də axşam saatlarında erməni silahlı birləşmələri Füzuli rayonunun Alxanlı kəndini minaatanlardan atəşə tutub. Təxribat nəticəsində Alxanlı kənd sakinləri - 1966-cı il təvəllüdlü Quliyeva Sahibə İdris qızı və onun nəvəsi 2016-cı il təvəllüdlü Quliyeva Zəhra Elnur qızı həlak olub, 1965-ci il təvəllüdlü Quliyeva Sərvinaz İltifat qızı isə ağır yaralanıb.

Milli.Az

Digər maraqlı xəbərlər Milli.Az-ın Facebook səhifəsində

Şərh yaz:

0 Şərh:

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.