ANCA-dan etiraf: Ermənistan Azərbaycana məğlub oldu

ABŞ-nin ən böyük erməni lobbi təşkilatı olan ANCA-nın xəyalları bir daha puç olduqdan sonra, təşkilatın rəhbəri Ermənistanın növbəti dəfə Azərbaycana məğlub olduğunu qəbul edib. Təşkilat bu dəfə puç olan xəyallarının günahkarı kimi ABŞ-nin getməkdə olan administrasiyasını ittiham etməyə çalışıb.

Belə ki, təşkilat Ağ Evdə bir neçə günü qalmış Bayden administrasiyası ilə Ermənistan arasında imzalanan "strateji saziş"in boş və manasız bir kağız parçası olduğunu dərk edərək, panikaya qapılıb.

ANCA-nın icraçı direktoru Aram Qambaryan imzalanan bu sənədi Bayden administrasiyasının Ermənistan üçün "vida hədiyyəsi" adlandırır, eyni zamanda, Amerikadakı erməni diasporunun gözündə öz günahlarını yumaq üçün açıq-aydın və boş bir cəhd olduğunu qeyd edir.

Xəyallar qurub və o xəyalların reallaşmadığını görən erməni lobbisi bunun günahını niyəsə ABŞ administrasiyasında görür, və imzalanan sənədi 5 gündən sonra Ağ Evi tərk edəcək Bayden administrasiyasının ermənilər qarşısında "günahını yumaq" cəhdi kimi dəyərləndirir. Həmişə olduğu kimi, "ermənilərdən başqa hamı günahkardır".

Bununla yetinməyib, ANCA ABŞ administrasiyasını Azərbaycanla qarşılıqlı faydalı əməkdaşlıqda da ittiham edir. Belə ki, ermənilərin Vaşinqtonla "strateji saziş" imzalamasını qeyd etmələrinin növbəti günü onlar daha bir zərbə alır: ABŞ Azərbaycanın "Silk Way Airlines" aviaşirkətinə 100 milyon dollardan çox sövdələşmə üçün maliyyə ayırır. Şirkətin, öz növbəsində, bu vəsaitləri "Boeing"dən yük təyyarələri almaq üçün istifadə edəcəyi məlum olur.

İsteriyaya qapılan erməni lobbisi bunu görüb aviaşirkəti "silah daşımaqda", ABŞ administrasiyasını isə Azərbaycanla faydalı əməkdaşlıq etməkdə ittiham edir. Məlum məsələdir ki, onlar ABŞ-nin ermənilər ilə kağız parçası imzaladığı zaman, Azərbaycanla real və qarşılıqlı fayda gətirəcək razılaşmalar imzalanmasını həzm edə bilmir. Yük daşıması ilə məşğul olan və yetərincə tanınan bir aviaşirkəti "silah daşımaqda" boş və əsassız ittiham etməkləri bunun açıq göstəricisidir.

Bütün bunlar - ABŞ administrasiyasına və Azərbaycan aviaşirkətinə qarşı isterik ittihamlar - yalnız erməni lobbisinin fiaskoya uğradığını və ABŞ səhnəsində Azərbaycana yenidən məğlub olduğunu sübut edir.

Milli.Az