İsmayıllıda yaşayış binasının bir sıra problemləri həll edilmir.
Milli.Az XƏZƏR TV-yə istinadən bildirir ki, söhbət İsmayıllı şəhər, Xurşidbanu Natəvan küçəsində yerləşən yeni tikilmiş binadan gedir.
Yeni mənzillərdə yaşayan sakinlər kommunal xidmətlərdən narazıdır.
Sakinlər bildirir ki, havalar soyumamış binanın istilik və su problemi həll olunmalıdır. Onların telefon və internet üçün etdikləri müraciətlər də nəticəsiz qalıb.
Problemə münasibət bildirən İsmayıllı rayon Mənzil İstismar Sahəsinin rəisi Hikmət Hünbətov "Xəzər Xəbər"ə deyib ki, mövcud vəziyyətdən xəbərdardırlar. Onun sözlərinə görə, bina İsmayıllı rayon Mənzil İstismar Sahəsinin balansına keçmədiyi üçün yaranmış çətinlikləri aradan qaldırmaq mümkün deyil.
İsmayıllı Rayon İcra Hakimiyyətindən isə bildirilib ki, binda yaşayan sakinlər özləri mənzil mülkiyyətçilərinin müştərək cəmiyyətini yaradıb, idarəetməni öz üzərlərinə götürməlidirlər.Bundan sonra müvafiq qurumlarla müqavilə imzalamaqla kommunal xidmətlərdən yararlana bilərlər.O da bildirilib ki, binalara artıq telefon və internet kabelləri çəkilib.Yaxın günlərdə istifadəyə veriləcək.
Xezerxeber.az mövzu ilə bağlı daha ətraflı videomaterialı təqdim edir:
Milli.Az