"Son vaxtlar koronavirusdan dünyasını dəyişən sənətçiləri bir-bir yola salırıq. İndi kim dünyasını dəyişirsə, qoyurlar koronavirusun boynuna".
Milli.Az "yenisabah.az"a istinadən xəbər verir ki, bunu Xalq artisti Flora Kərimova bildirib.
O əlavə edib: "Bu gün internetdə belə bir məlumat oxudum ki, Dünya Səhiyyə Təşkilatı açıqlama verib, bu bəla 2024-cü ilə qədər davam edəcək. Doğrudursa, yalan olsun! Onda belə çıxır ki, həmin vaxta qədər kim özünü saxladısa, saxladı, qurtuldu.
Bir tanınmış professor da deyir ki, özünüzü təbii vasitələrlə qorumağa çalışın, çoxlu limon yeyin. A kişi, bu, planlaşdırılmış xəstəlikdir. Bizim bəxtimizə niyə düşdü, bilmirəm. Onsuz da cavanlarımızı müharibədə itirmişdik".
"Mən də özümü maksimum qorumağa çalışıram" - deyən 80 yaşlı müğənni vaksinasiyadan imtina edənlər arasındadır. O, çarəni təbii üsullarda tapıb:
"Peyvənd vurdurmamışam, heç vaxt da vaksinasiyaya getmərəm, hələ ağlımı itirməmişəm. Belə düşünürəm. Özümü təbii yollarla qorumağa çalışıram. Həyatdan yapışıb durmuşam. Deyirəm ki, nəvəmi görənə qədər Tanrı mənə möhlət versin. Zarafatımdan da qalmıram, pozitiv olmağa çalışıram. Hər şey Allahdan asılıdır, hər birimizin ömrü onun əllərindədir. Allah hər kəsə uzun, xoşbəxt ömür yaşamağı nəsib etsin. Ən əsası isə heç vaxt kimisə ağıllı həyatla qəddar həyat tərzi arasında seçim qarşısında qoymasın. İndiki dövrdə insanlar vicdanlarını itirə-itirə yaşayırlar. Allah bizi bax bundan qorusun".
Milli.Az