"Taliban" hərəkatının nümayəndəsi Zəbihulla Mücahidin dediyinə görə, Pəncşir vadisindəki müxaliflərlə ən yaxın vaxtlarda sülh anlaşması imzalanacaq.
Milli.Az bildirir ki, Shamshad News-a verdiyi müsahibəsində Z.Mücahid deyib: "Pəncşirdəki adamlarla daimi təmaslardayıq. Ağsaqqallarla, nüfuzlu şəxslərlə danışıqlar aparırıq. Danışıqlar problemi ən yaxın vaxtda, döyüşlər olmadan həll edəcək. 80 faiz əminəm ki, hərbi əməliyyatlara ehtiyac qalmayacaq".
Xatırladaq ki, Əfqanıstanda hakimiyyəti ələ keçirmiş "Taliban" hərəkatına tabe olmayan Əhməd Məsud və sabiq vitse-prezident Əmrullah Salihin tərəfdarları, habelə Əfqanıstan ordusunun yüzlərlə hərbçisi Pəncşir vilayətindədir.
Onlar taliblərə qarşı sonadək mübarizə aparacaqlarını bəyan edirlər.
Əhməd Məsud əfsanəvi tacik komandir, "Pəncşir Aslanı" kimi tanınmış mərhum Əhməd Şah Məsudun oğludur.
Milli.Az