Azərbaycanda neft-qaz sektoruna yatırılmış investisiyaların həcmi artıb

20 Yanvar 2021 17:45

2020-ci ildə Azərbaycanda əsas kapitala 17 milyard 28,1 milyon manat məbləğində, yaxud 2019-cu illə müqayisədə 8,3 faiz az vəsait yönəldilib.

Milli.Az Trend-ə istinadən bildirir ki, neft-qaz sektoruna yatırılmış investisiyaların həcmi 0,3 faiz artıb, qeyri neft-qaz sektoruna yönəldilən vəsaitin həcmi isə 12,3 faiz azalıb. İstifadə olunmuş vəsaitin 11 milyard 175,8 milyon manatı və ya 65,6 faizi məhsul istehsalı sahələrinə, 4 milyard 485,0 milyon manatı (26,4 faizi) xidmət sahələrinə, 1 milyard 367,3 milyon manatı (8,0 faizi) isə yaşayış evlərinin tikintisinə sərf olunub.

Əsas kapitala yönəldilmiş vəsaitlərin 11 milyard 911,1 milyon manatını və ya 69,9 faizini daxili vəsaitlər təşkil edib. Sərmayə qoyuluşunun 10 milyard 954,1 milyon manatı və ya 64,3 faizi bilavasitə tikinti-quraşdırma işlərinin yerinə yetirilməsinə sərf olunub.

Əsas kapitala yönəldilmiş vəsaitin ümumi dəyərində müəssisə və təşkilatların vəsaitləri 50,4 faiz, büdcə vəsaitləri 27,6 faiz, bank kreditləri 6,2 faiz, əhalinin şəxsi vəsaitləri 5,7 faiz, sair vəsaitlər 8,6 faiz, büdcədənkənar dövlət fondlarının vəsaitləri isə 1,5 faiz təşkil edib.

Milli.Az