Evində Mirzəyevin siqaretini, Məmmədovun gəlininə verdiyi gülü saxlayır - FOTO

1 Dekabr 2020 18:29

Gəncədə yaşayan Elnarə Tağıyeva evinin 3 otağında Qarabağ Qəhrəmanları Muzeyi yaradıb.

Milli.Az qafqazinfo-ya istinadən xəbər verir ki, bu barədə Türkiyənin Anadolu Agentliyinin reportajında bildirilir.

Qeyd olunub ki, muzeydə Qarabağ döyüşlərində 500-ə yaxın şəhid və qazinin xatirələri saxlanılır. 

Tağıyeva 28 ildir şəhid və qazi ailələrini ziyarət etdiyini, onların şəxsi əşya və fotolarını topladığını, hətta ərazisində 5 ev olan kəndlərə getdiyini bildirib. O, muzeyin ilk əşyasının Azərbaycanın Milli Qəhrəmanı Yusif Mirzəyevə məxsus siqaret olduğunu deyib.

Şəhid Ülvi Məmmədovun toyunda gəlininə verdiyi güldən, Ermənistan sərhədinə atılan güllədən, girov götürülməmək üçün özü ilə gətirdiyi zəhəri içən Qaratel Hacımahmudova kimi onlarla şəhidin əşyaları muzeydə yer alıb.

"1992-ci ildən bəri şəhid və qazi evlərinə gedirəm. Onlardan birinin anası "Oğlumu ürəyinizdə saxlayıb qapımıza gəldinizsə, deməli, oğlum ölmədi" söylədi", - deyə Tağıyeva bildirib.

O vurğulayıb ki, şəhid ailələri və qazilər tərəfindən bağışlanan əşyalar arasında şəhidlərin geyimləri də var: "Hamısı çox qiymətli əşyalardır. Hər birində bir ailənin göz yaşı var. Otaq qalmayıb, amma əldə etdiklərimi sərgiləməliyəm. Təzə şəhidlərimizin məzarlarına getdik və ailələri ilə söhbət etdik. Qırx mərasimi çıxandan sonra yadigarlarını toplamağa başlayacağıq. Hər şəhidin evindən və ailəsindən ürək ağrısı və göz yaşı ilə çıxdıq. Hamısının öz xatirələri var. Gənc olsalar da, çox şərəfli bir həyat keçirdilər. Mən muzeyin bu evdə qalmasını istəyirəm. Başqa bir yerə aparmağa dözə bilmirəm. Ancaq genişləndirmək istəyirəm".

Elnarə Tağıyeva öz ailəsində əsgərlərin olduğunu və hətta bibisi nəvəsi Turxan Məmmədovdan iki aydır xəbər ala bilmədiyini qeyd edib.

Milli.Az