“Azərbaycanımla, xalqımla qürur duyuram” - İnna Rıskal

21 Noyabr 2020 12:00

"Öncə başda cənab Prezident İlham Əliyev olmaqla, Azərbaycan xalqını təbrik edirəm". 

Milli.Az bildirir ki, bunu apasport.az saytına açıqlamasında voleybol əfsanəsi İnna Rıskal deyib.

Uzun illər sabiq SSRİ millisinin və Bakının "Neftçi" klubunun şərəfini qorumuş 76 yaşlı veteran idmançı Azərbaycan Ordusunun zəfərindən danışıb. Erməni vəhşiliyini pisləyən veteran voleybolçu qələbə münasibəti ilə xalqımızı təbrik edib: "Belə gözəl günləri bizlərə nəsib etdiyinə görə Prezidentimizə və Azərbaycan əsgərlərinə təşəkkür edirəm. Müharibədə şəhid olan igidlərimizə Allahdan rəhmət diləyir, ailələrinə, yaxınlarına başsağlığı verir, yaralı oğullarımıza isə şəfalar diləyirəm. Doğrusu, sentyabrın 27-də eşidəndə ki, Azərbaycanın işğal olunmuş torpaqlarında müharibə başlayıb, düşmənlərimiz yenidən Azərbaycan torpağına hücum edib, çox pis olmuşdum. Bu bizim üçün gözlənilməz idi. Neçə illər Azərbaycan torpaqlarını işğalda saxlayan düşmənin yenidən hücuma keçməsi, dinc əhaliyə hücum etməsi vəhşilikdir".

Olimpiya Oyunlarında iki qızıl, iki gümüş medal qazanan Rıskal Azərbaycan Ordusunun Vətən Müharibəsində yeni tarix yazdığını xüsusi vurğulayıb: "Bütün vəhşiliklərə baxmayaraq, Azərbaycan bu gün qalib gəldi, 30 il düşmən işğalında olan torpaqlarını azad etdi. Bilirsiniz, Qarabağ həmişə Azərbaycanın tərkibində olub. Bugünkü kimi yadımdadır, mən gənc olanda biz Qarabağda tez-tez təlim-məşq toplantıları keçər, yarışlar təşkil edərdik. Çox sevinirəm ki, Azərbaycan tarixi torpaqlarına qovuşdu. Azərbaycan bu gözəl yerlərdə yenidən gözəl tədbirlər, yarışlar keçirəcək. Buna inanıram. Çünki Azərbaycan çox güclü ölkədir. Artıq neçə ildir ki, ölkəmiz bir çox beynəlxalq yarışlara, təbirlərə ev sahibliyi edir. Təşkilatçılıq işləri, yüksək qonaqpərvərlik və ölkəmizin gündən-günə daha da inkişaf etməsi hər zaman bütün iştirakçılar, qonaqlar tərəfindən uzun müddət danışılıb". 

Müəyyən müddətdir Rusiyada yaşayan Rıskal vətən üçün darıxdığını, Qələbə Günü münasibətilə təşkil olunacaq tədbirlərdə Azərbaycana gəlmək arzusunu dilə gətirib: "Mən bakılıyam, valideynlərim də burada dünyaya gəliblər. Bakı, Azərbaycan mənim - bizim vətənimizdir. Azərbaycanı, vətənimi çox sevirəm. Ölkəmiz hər zaman çoxlu millətlərin xoşbəxt, firavan yaşadığı ölkə olub və bu gündə belədir. İnsanlar Azərbaycanda rahat, dost kimi, qardaş kimi mehriban yaşayırlar. Əlbəttə, bütün bunlara görə hər kəs ölkə başçımıza minnətdar olmalıdır. Öz adımdan cənab Prezidentimizə bir daha təşəkkür edirəm, Azərbaycanın daha da güclü və gözəl ölkə olacağına inanıram. Mən də bu gün Azərbaycanda qələbə sevincini sizlərlə birgə yaşamağı çox istərdim. Amma səhhətimlə bağlı uzun zamandır heç bir yerə gedə bilmirəm. Xalqımız bilsin ki, həmişə olduğu kimi bu gün də Azərbaycanımla, xalqımla qürur duyuram. Azərbaycanda olmasam da, ürəyim həmişə ordadır".

Milli.Az